રાજ્યમાં મ્યુકરમાઈકોસિસના કેસમાં સતત વધારો જોવા મળી રહ્યો છે. રાજ્યના પાંચ શહેરોમાં મ્યુકરમાઈકોસિસના નવા 62 કેસ સામે આવ્યા છે. તેની સાથે સાત દર્દીઓના મોત પણ થયા છે. અમદાવાદ સિવિલમાં જ મ્યુકરમાઈકોસિસના 600 થી વધુ કેસ રહેલા છે. જેના કારણે અમદાવાદમાં સૌથી વધુ ચિંતા વધી છે.
મ્યુકરમાઈકોસિસના સૌથી વધુ નવા કેસ રાજકોટ શહેરથી સામે આવ્યા છે. રાજકોટમાં 20, વડોદરામાં 19, અમદાવાદમાં 14, સુરતમાં છ અને જામનગરમાં ત્રણ કેસ સામે આવ્યા છે. જયારે ગ્રામ્ય વિસ્તારોમાં પણ મ્યુકરમાઈકોસિસના કેસમાં સતત વધારો જોવા મળ્યો છે.
બનાસકાંઠા જિલ્લામાં એક મહિનામાં મ્યુકરમાઈકોસિસના 23 કેસ સામે આવ્યા છે. જ્યારે આ દરમિયાન પાંચના મોતના થયા હતા. આ સિવાય પાટણ જિલ્લામાં મ્યુકરમાઈકોસિસના 11 કેસ સામે આવ્યા છે. તેમાથી સાતને અમદાવાદ રિફર કરવામાં આવ્યા છે. આણંદ જિલ્લામાં મ્યુકરમાઈકોસિસના 34 દર્દીઓ સારવાર હેઠળ રહેલા છે. સાબરકાંઠા જિલ્લામાં મ્યુકરમાઈકોસિસના 43 કેસ સામે આવ્યા છે.
આ સિવાય અમદાવાદની સિવિલ હોસ્પિટલમાં આવેલ ડેંટલ હોસ્પિટલમાં મ્યુકરમાઈકોસિસના 70 દર્દીઓની સર્જરી કરવામાં આવી હતી. જેમાં દર્દીઓના દાંત-દાઢ સહિત જડબા-તાળવા પણ કાઢવા પડ્યા હતા. કેસ વધતા ડેંટલ હોસ્પિટલમાં ચાર ઓપરેશન થિયેટરમાં હાલ સર્જરી કરાઈ રહી છે. જેમાં એક ડેંટલ હોસ્પિટલ, એક પેરાપ્લેજિયા અને બે કિડની હોસ્પિટલમાં ઓપરેશન થિયેટર કાર્યરત કરવામાં આવ્યા છે. ત્યાં રોજના આશરે 12 જેટલા ઓપરેશન કરવામાં આવી રહ્યા છે.
તેની સાથે અમદાવાદ સિવિલમાં મ્યુકર માઈકોસિસના 600 થી વધુ કેસ થયા છે. જેમાં 140 જેટલા દર્દીઓ ઓપરેશન માટે વેઈટિંગમાં રહેલા છે. જ્યારે અત્યાર સુધીમાં 37 દર્દીઓના મોત થયા છે. અમદાવાદમાં મ્યુકરમાઈકોસિસના દર્દીઓની સારવાર માટે ઉપયોગમાં લેવાતા ઈંજેક્શન એમ્ફોટેરેસિન બી હવે એલજી હોસ્પિટલની જગ્યાએ સિવિલ હોસ્પિટલમાંથી પ્રાપ્ત થશે.