ઉત્તર પ્રદેશના શાહજહાંપુરને દિલ્હીથી જોડતા હાઈવે પર આવેલ કોલાઘાટ બ્રિજ તૂટીને નીચે પડી ગયો છે. પ્રાપ્ત માહિતી અનુસાર, જલાલાબાદ પોલીસ સ્ટેશન પાસે રામગંગા કોલાઘાટ પુલનો એક ભાગ તૂટીને નીચે પડી ગયો છે. આ અકસ્માત મોડી રાત્રે થયો હતો, જેના કારણે કોઈ મોટી જાનહાનિ થઈ ન હતી. જો કે અકસ્માત સમયે એક કાર પુલ પરથી પસાર થઈ રહી હતી, જે અધવચ્ચે ફસાઈ ગઈ હતી. કારમાં સવાર લોકોને સામાન્ય ઈજાઓ થઈ હતી. આ અકસ્માતને કારણે શાહજહાંપુર-બદાયૂં રોડ પર વાહન વ્યવહાર થંભી ગયો છે.
તમને જણાવી દઈએ કે વર્ષ 2007માં બસપાના શાસન દરમિયાન બનેલો આ કોલાઘાટ પુલ શાહજહાંપુરને બદાયૂંથી જોડે છે. આ પુલ પર સતત વાહનોની અવરજવર રહે છે. જણાવવામાં આવી રહ્યું છે કે આ પુલ ઘણા વર્ષોથી જર્જરિત થી ગયો હતો. ગયા મહિને જ આ પુલ અધવચ્ચે જ તૂટી પડ્યો હતો. આ પછી, તેના પર એક અઠવાડિયાથી વધુ સમય સુધી સમારકામનું કામ પણ કરવામાં આવ્યું હતું. આ દરમિયાન પુલની બંને તરફ પાકી દિવાલ બનાવવામાં આવી હતી, પરંતુ પુલની ફરીથી સમયસર તપાસ ન થવાના કારણે આ અકસ્માત થયો હતો.
શાહજહાંપુર-દિલ્હી હાઈવે અટક્યો, આ માર્ગનો કરો ઉપયોગ: આ અકસ્માત બાદ શાહજહાંપુર-દિલ્હી હાઈવે પર વાહનવ્યવહાર ઠપ થઇ ગયો છે. આવી સ્થિતિમાં, વહીવટીતંત્રે અલ્લાહગંજ તરફ વાહનોને ડાયવર્ઝન કરી દીધા છે. આવી સ્થિતિમાં, બદાયૂં અને દિલ્હીથી આવતા વાહનો મિર્ઝાપુર પોલીસ સ્ટેશનથી બે કિલોમીટર આગળ તારાપુર તિરાહાથી ફરુખાબાદ રોડ થઈને અલ્હાગંજના રસ્તેથી નીકળી શકાય છે. જયારે, શાહજહાંપુર, જલાલાબાદ બાજુથી આવતા વાહનો બરેલી-ફર્રુખાબાદ રોડથી રાજેપુર, અમૃતપુર થઈને તારાપુર તિરાહા થઈને નીકળી શકે છે.