ઇલેક્ટ્રિક વાહનમાં આગ લાગવાનું કારણ હવે સામે આવ્યું છે. આગની ઘટનાઓ અંગે ગંભીર વલણ અપનાવતા સરકારે તપાસ શરૂ કરી હતી અને હવે તેના પ્રાથમિક અહેવાલમાં આગ લાગવાના કારણો સામે આવ્યા છે.
બેટરી સેલની નિષ્ફળતાનું મુખ્ય કારણ
સરકારની પ્રારંભિક તપાસમાં ઇલેક્ટ્રિક સ્કૂટરમાં આગ લાગવાનું કારણ બેટરી સેલ અને મોડ્યુલની ખામી હોવાનું જણાવવામાં આવ્યું છે. રોઇટર્સે બે સરકારી સૂત્રોને ટાંકીને અહેવાલ આપ્યો છે કે સરકારે ત્રણ કંપનીઓના ઇલેક્ટ્રિક સ્કૂટરમાં આગ લાગવાની ઘટનાની તપાસ શરૂ કરી છે. જેમાં ઓલા ઇલેક્ટ્રિક અને ઓકિનાવાનો સમાવેશ થાય છે.
ઓલા અને ઓકિનાવામાં આ ભૂલ મળી
રિપોર્ટમાં દાવો કરવામાં આવ્યો છે કે ઓલા સ્કૂટરમાં આગ લાગવા પાછળનું કારણ બેટરી સેલ અને બેટરી મેનેજમેન્ટ સિસ્ટમમાં ખામી છે. જ્યારે ઓકિનાવાના કિસ્સામાં, બેટરી સેલ અને બેટરી મોડ્યુલ સંબંધિત ખામીઓ મળી આવી હતી. સાથે જ પ્યોર ઈવીના સ્કૂટરમાં આગ લાગવા પાછળનું કારણ બેટરી કેસીંગ યોગ્ય ન હોવાનું જણાવવામાં આવ્યું છે.
સમાચારમાં દાવો કરવામાં આવ્યો છે કે તપાસનો અંતિમ રિપોર્ટ આગામી બે સપ્તાહમાં આવશે. સરકારે વધુ તપાસ માટે ત્રણેય કંપનીઓના બેટરી સેલના સેમ્પલ લીધા છે. જો કે, તે દરમિયાન Ola ઇલેક્ટ્રિકે દાવો કર્યો છે કે તેના માત્ર એક સ્કૂટરમાં થર્મલ સમસ્યાઓ જોવા મળી છે. જ્યારે કંપનીની બેટરી મેનેજમેન્ટ સિસ્ટમમાં કોઈ ખામી નથી.
તાજેતરના સમયમાં દેશમાં ઇલેક્ટ્રિક સ્કૂટરમાં આગ લાગવાની ઘણી ઘટનાઓ સામે આવી છે. જેમાં 3 લોકોએ જીવ પણ ગુમાવ્યો હતો. બાદમાં, ઓકિનાવા અને ઓલાએ પણ મોટી સંખ્યામાં તેમના સ્કૂટર પરત મંગાવી લીધા હતા.