વીજળીનું બિલ ઘણું વધી ગયું છે. આવા અનેક કિસ્સાઓ સામે આવ્યા છે. પરંતુ જો કોઈનું વીજળીનું બિલ લાખોમાં નહીં, કરોડોમાં નહીં, પરંતુ અબજો રૂપિયામાં હોય તો શું. મધ્યપ્રદેશના ગ્વાલિયરમાં આ ઘટના બની છે. ગ્વાલિયરમાં વીજળી વિભાગે જ્યારે એક પરિવારને અબજો રૂપિયાનું બિલ સોંપ્યું ત્યારે સસરા અને પુત્રવધૂ ચોંકી ગયા. સસરાને તાત્કાલિક હોસ્પિટલમાં દાખલ કરવા પડ્યા.
કેટલા અબજનું વીજ બિલ?
મીડિયા રિપોર્ટમાં જણાવ્યા અનુસાર, આ ચોંકાવનારો મામલો ગ્વાલિયરની શિવ બિહાર કોલોનીનો છે. અહીં રહેતા સંજીવ કનકને વ્યવસાયે વકીલ છે. તેમની પત્ની પ્રિયંકા ગુપ્તા ગૃહિણી છે. સંજીવે કહ્યું કે આ વખતે જ્યારે તેમનું વીજળીનું બિલ આવ્યું તો પરિવારના તમામ સભ્યોના પરસેવો છૂટી ગયો. તેમના કહેવા પ્રમાણે તેમનું 34 અબજ રૂપિયાથી વધુનું વીજળીનું બિલ આવ્યું, જે જોઈને તેમની પત્ની પ્રિયંકાનું બીપી વધી ગયું અને તેમની તબિયત અચાનક બગડી ગઇ. તેમના પિતા રાજેન્દ્ર પ્રસાદ ગુપ્તા કે જેઓ હાર્ટ પેશન્ટ છે, બિલ વિશે સાંભળીને તેમનું બ્લડ પ્રેશર પણ વધી ગયું હતું. આ પછી પિતાને હોસ્પિટલમાં દાખલ કરવા પડ્યા હતા.
બિલ સુધાર્યા પછી કેટલું બાકી હતું?
મીડિયા રિપોર્ટ અનુસાર, અબજો રૂપિયાના આ બિલને યોગ્ય કરાવવા માટે સંજીવે વીજળી વિભાગના અનેક ચક્કર લગાવવા પડ્યા હતા. આ પછી વીજળી કંપનીએ તેના બિલમાં સુધારો કર્યો. હવે સંજીવનું વીજળીનું બિલ માત્ર 1300 રૂપિયા છે.
અબજો રૂપિયાના વીજ બિલ અંગે વીજ કંપનીના જનરલ મેનેજરનું કહેવું છે કે આ માનવીય ભૂલ હતી, જે હવે સુધારી લેવામાં આવી છે. જનરલ મેનેજરના જણાવ્યા અનુસાર આ બાબતને ગંભીરતાથી લઈને સંબંધિત અધિકારીઓ સામે કાર્યવાહી કરવામાં આવી છે.