ભારતીય ક્રિકેટ ટીમને રવિવારે ટી-20 વર્લ્ડ કપ મેચમાં દક્ષિણ આફ્રિકાએ પાંચ વિકેટે હરાવ્યું હતું. વર્તમાન સંસ્કરણમાં ટીમ ઈન્ડિયાની આ પ્રથમ હાર હતી. પર્થમાં આ હાર બાદ રોહિત શર્માની કેપ્ટન્સીમાં રમી રહેલી ટીમ હવે પોતાના ગ્રુપમાં નંબર-2 પર સરકી ગઈ છે. તેના 3 મેચમાં 4 પોઈન્ટ છે. આ સાથે જ દક્ષિણ આફ્રિકા એટલી જ મેચમાં 5 પોઈન્ટ સાથે ટોચ પર છે. આવી સ્થિતિમાં સેમીફાઈનલમાં પહોંચવાના સમીકરણ પણ બદલાઈ ગયા છે.
ભારત 5 વિકેટે હારી ગયું હતું
પર્થમાં રમાયેલી આ મેચમાં ટીમ ઈન્ડિયાએ ટોસ જીતીને પ્રથમ બેટિંગ કરીને 9 વિકેટે 133 રન બનાવ્યા હતા, જે બાદ દક્ષિણ આફ્રિકાએ 5 વિકેટ ગુમાવી બે બોલ બાકી રહેતા લક્ષ્યાંક હાંસલ કરી લીધો હતો. 170ના સ્ટ્રાઈક રેટથી રમતા સૂર્યકુમાર યાદવે 40 બોલમાં 6 ચોગ્ગા અને 3 છગ્ગા સાથે 68 રન બનાવ્યા હતા. 4 વિકેટ લેનાર લુંગી એનગીડીને પ્લેયર ઓફ ધ મેચ જાહેર કરવામાં આવ્યો હતો. સાઉથ આફ્રિકા તરફથી એડન માર્કરામે 52 અને ડેવિડ મિલરે 46 બોલમાં 59 રનની અણનમ ઇનિંગ રમી હતી. આ દરમિયાન તેણે 4 ફોર અને 3 સિક્સર ફટકારી હતી. ફાસ્ટ બોલર અર્શદીપ સિંહે બે વિકેટ ઝડપી હતી.
દક્ષિણ આફ્રિકા આગળ વધવા માટે તૈયાર
ટેમ્બા બાવુમાની આગેવાની હેઠળની ટીમ સાઉથ આફ્રિકાનું સેમિફાઇનલમાં પહોંચવું લગભગ નિશ્ચિત છે. તેણે 3 મેચમાંથી 5 પોઈન્ટ મેળવ્યા છે અને તેનો નેટ રન રેટ પણ 2.772 છે. તેણે હજુ પાકિસ્તાન અને નેધરલેન્ડ સામે એક-એક મેચ રમવાની છે. આ બેમાંથી એક મેચ જીત્યા બાદ પણ દક્ષિણ આફ્રિકાના સાત પોઈન્ટ હશે, જેનાથી સેમીફાઈનલમાં તેનું સ્થાન નિશ્ચિત થઈ જશે. જો બાંગ્લાદેશ અને ઝિમ્બાબ્વે તેમની બાકીની બંને મેચ જીતે તો તેઓ અનુક્રમે આઠ અને સાત પોઈન્ટ મેળવશે. તેમ છતાં દક્ષિણ આફ્રિકાનો નેટ રન રેટ તેમને આગળ લઈ જવા માટે પૂરતો હોવો જોઈએ.
ભારત પર નજર
તમામની નજર ટીમ ઈન્ડિયા પર છે કે દક્ષિણ આફ્રિકા સામેની હાર બાદ તેની પાસે શું તકો બચી છે. દક્ષિણ આફ્રિકા સામે ભારતની હારનો અર્થ એ છે કે તેણે સેમિફાઇનલમાં પહોંચવા માટે તેમની છેલ્લી બંને મેચ જીતવી પડશે. જો તેઓ બાંગ્લાદેશને હરાવશે પરંતુ ઝિમ્બાબ્વે સામે હારી જશે તો ઝિમ્બાબ્વે અને દક્ષિણ આફ્રિકા બંને સાત કે તેથી વધુ પોઈન્ટ સાથે તેનાથી ઉપર જશે. જો ભારત ઝિમ્બાબ્વેને હરાવે પરંતુ બાંગ્લાદેશ સામે હારે તો બાંગ્લાદેશ અને દક્ષિણ આફ્રિકા ભારતને પાછળ છોડી શકે છે. હાલમાં બુધવારે જ્યારે ભારત બાંગ્લાદેશ સામે ટકરાશે ત્યારે વરસાદની 70% શક્યતા છે. તેથી હવામાનનું પણ ધ્યાન રાખવું પડશે.
બાંગ્લાદેશ પણ રેસમાં છે
શાકિબ અલ હસનની આગેવાનીમાં બાંગ્લાદેશે અત્યાર સુધીમાં 3 મેચ રમી છે અને તેના 4 પોઈન્ટ ભારતની બરાબરી છે. જોકે, નેટ રન રેટ (-1.533)ના સંદર્ભમાં તે પાછળ છે. તેણે હજુ ભારત અને પાકિસ્તાન સામે મેચ રમવાની છે જે આસાન નહીં હોય. આ ટીમે રેસમાં રહેવા માટે ઓછામાં ઓછી એક જીત મેળવવી પડશે. જો ટીમ બંને મેચ જીતે છે, તો તેને આઠ પોઈન્ટ મળશે અને અન્ય પરિણામોને ધ્યાનમાં લીધા વગર સેમિફાઈનલમાં સ્થાન મેળવશે.
પાકિસ્તાન પાસે હજુ તક છે
પાકિસ્તાન હજુ પણ સેમીફાઈનલમાં પહોંચવાની રેસમાં છે. બાબર આઝમની કેપ્ટનશીપવાળી ટીમે અત્યાર સુધી 3 મેચમાં 2 પોઈન્ટ મેળવ્યા છે. તેનો નેટ રન રેટ 0.765 છે. ભારત સામે સાઉથ આફ્રિકાની જીતે ચોક્કસપણે પાકિસ્તાનની સંભાવનાઓને ફટકો આપ્યો છે. પાકિસ્તાન વધુમાં વધુ છ પોઈન્ટ મેળવી શકે છે, જ્યારે દક્ષિણ આફ્રિકા નેધરલેન્ડને હરાવશે તો તેના સાત પોઈન્ટ થઈ જશે. જો ભારત તેની બાકીની બેમાંથી એક મેચ ગુમાવે છે અને છ પર સમેટાઇ જાય છે, તો તે હજુ પણ કટ્ટર હરીફો વચ્ચે નેટ રન રેટની લડાઈ બની શકે છે.