શશિ થરૂર ગુજરાત ચૂંટણીમાં પ્રચાર નહીં કરે. આ અંગે અનેક પ્રકારની ચર્ચાઓ ચાલી રહી છે. એવી ચર્ચા છે કે કોંગ્રેસના નેતા શશિ થરૂરે ગુજરાતમાં આવતા મહિને યોજાનારી ચૂંટણી માટે પાર્ટીના પ્રચારથી પોતાને દૂર કરી દીધા છે કારણ કે તેમને પાર્ટીના સ્ટાર પ્રચારકોની યાદીમાંથી કાઢી નાખવામાં આવ્યા છે. સૂત્રોએ જણાવ્યું કે કોંગ્રેસની વિદ્યાર્થી પાંખ દ્વારા શશિ થરૂરને ગુજરાતમાં પ્રચાર માટે આમંત્રણ આપવામાં આવ્યું હતું, પરંતુ તેમણે ઇનકાર કર્યો હતો.
કોંગ્રેસે થરૂરને સાઈડલાઈન કરવાનો ઈન્કાર કરી દીધો છે. કોંગ્રેસના સૂત્રોએ જણાવ્યું કે તેઓ સ્ટાર પ્રચારકોની યાદીમાં પણ નથી. ગઈકાલે કોંગ્રેસે ગુજરાત વિધાનસભા ચૂંટણી માટે તેના સ્ટાર પ્રચારકોની યાદી જાહેર કરી હતી. કોંગ્રેસે પ્રચારના પ્રથમ તબક્કા માટે પોતાના 40 સ્ટાર પ્રચારકોની યાદી જાહેર કરી હતી. સ્ટાર પ્રચારકોની યાદીમાં પાર્ટી અધ્યક્ષ મલ્લિકાર્જુન ખડગે, પૂર્વ અધ્યક્ષ સોનિયા ગાંધી, પૂર્વ અધ્યક્ષ રાહુલ ગાંધી, પ્રિયંકા ગાંધી વાડ્રા, અશોક ગેહલોત, ભૂપેશ બઘેલ, ભૂપેન્દ્ર સિંહ હુડ્ડા, દિગ્વિજય સિંહ, કમલનાથ, સચિન પાયલટ, તારિક અનવર, બીકે હરિપ્રસાદ, કોંગ્રેસના અશોક ચવ્હાણ, શક્તિસિંહ ગોહિલ, રઘુ શર્મા, મોહન પ્રકાશ સહિત અનેક અગ્રણી નેતાઓ સામેલ છે.
સ્ટાર પ્રચારકોની યાદીમાં પવન ખેડા, ભરતસિંહ સોલંકી, ઉષા નાયડુ, કન્હૈયા કુમાર, કાંતિલાલ ભુરિયા, ઈમરાન પ્રતાપગઢી, અમરિંદર સિંહ રાજા બ્રાર, અર્જુન મોઢવાડિયા, સિદ્ધાર્થ પટેલ વગેરેના નામ પણ સામેલ છે. બીજી તરફ ગુજરાતના મુખ્યમંત્રી ભૂપેન્દ્ર પટેલ બુધવારે ગુજરાત વિધાનસભાની ચૂંટણી માટે ઉમેદવારી નોંધાવશે. આ દરમિયાન તેમની સાથે કેન્દ્રીય ગૃહમંત્રી અમિત શાહ પણ હાજર રહેશે.
ગુજરાતની 182 સભ્યોની વિધાનસભા માટે બે તબક્કામાં 1 અને 5 ડિસેમ્બરે મતદાન થશે. પ્રથમ તબક્કામાં 89 બેઠકો પર અને બીજા તબક્કામાં સાણંદ સહિત 93 બેઠકો પર મતદાન થશે. બીજા તબક્કા માટે નામાંકન ભરવાની છેલ્લી તારીખ 17 નવેમ્બર છે.