Australia vs Afghanistan Series: ઓસ્ટ્રેલિયન ક્રિકેટ બોર્ડ (સીએ) એ અફઘાનિસ્તાન સામે ત્રણ મેચની વન-ડે મેચોની સિરીઝ રમવાથી ઇનકાર કરી દીધો છે. આ સિરીઝ માર્ચના અંતમાં યુએઇમાં રમવાની હતી. પરંતુ ઓસ્ટ્રેલિયન બોર્ડે તાલિબાનના કેટલાક નિર્ણયોના વિરોધમાં આ મોટું પગલું ભર્યું છે અને શ્રેણી રમવાનો ઇનકાર કરી દીધો છે.
ખરેખરમાં ઓસ્ટ્રેલિયન ટીમને ફેબ્રુઆરીમાં ભારતના પ્રવાસ પર ચાર ટેસ્ટ અને ત્રણ વન-ડે મેચોની સિરીઝ રમવાની હતી. આ પછી યુએઈ પહોંચ્યા બાદ અફઘાનિસ્તાન ટીમ સામે ત્રણ વનડે મેચોની શ્રેણી પણ નક્કી કરવામાં આવી હતી. પરંતુ ઓસ્ટ્રેલિયન ટીમ હવે આ શ્રેણી રમી શકશે નહીં.
અફઘાનિસ્તાનમાં મહિલાઓ પર ઘણા પ્રતિબંધો
જણાવી દઈએ કે અફઘાનિસ્તાનમાં તાલિબાનનું શાસન છે. તેણે પોતાના દેશમાં મહિલાઓ અને છોકરીઓ પર ઘણા નિયંત્રણો લાદ્યા છે. તેમને અભ્યાસની સાથે ઘરની બહાર કામ કરવાનો પણ અધિકાર નથી. છોકરીઓને રમતગમતમાં ભાગ લેવા પર પણ પ્રતિબંધ મુકવામાં આવ્યો છે. ઓસ્ટ્રેલિયન ક્રિકેટ બોર્ડે તાલિબાનના આ નિર્ણયના વિરોધમાં ક્રિકેટ સિરીઝ નહીં રમવાનો નિર્ણય લીધો છે.
ઓસ્ટ્રેલિયન બોર્ડે પણ પોતાના નિવેદનમાં આ જ વાતનો ઉલ્લેખ કર્યો છે. બોર્ડ દ્વારા જારી કરાયેલા એક નિવેદનમાં કહેવામાં આવ્યું છે કે, સીએ અફઘાનિસ્તાન સહિત વિશ્વભરમાં મહિલાઓ અને પુરુષોને રમતમાં લાવવા અને તેમના વિકાસ માટે પ્રતિબદ્ધ છે. પોતાના દેશમાં મહિલાઓ અને છોકરીઓની સ્થિતિ સુધારવા માટે અફઘાનિસ્તાન ક્રિકેટ બોર્ડ સાથે પણ સતત સંપર્કમાં છે.
ICCએ પણ આ બાબતો પર ચિંતા વ્યક્ત કરી હતી
સીએ એ તેની ઓસ્ટ્રેલિયન સરકારનો પણ સહયોગ માટે આભાર માન્યો છે. તેણે કહ્યું, ‘અમારા નિર્ણય (અફઘાનિસ્તાનથી શ્રેણી રદ કરવા)ને સમર્થન આપવા બદલ તમારો આભાર.’ તાજેતરમાં જ ઈન્ટરનેશનલ ક્રિકેટ કાઉન્સિલ (આઈસીસી)ના સીઈઓ જ્યોફ એલાર્ડિસે પણ અફઘાનિસ્તાનમાં આ વધી રહેલા કેસ અંગે ચિંતા વ્યક્ત કરી હતી.
અફઘાન ટીમને વન-ડે સુપર લીગ હેઠળ પોઈન્ટ મળશે
અફઘાનિસ્તાન આઈસીસીનું એકમાત્ર પૂર્ણ સભ્ય છે, જ્યાં મહિલા ટીમ નથી. 14 જાન્યુઆરીથી શરૂ થઈ રહેલા અંડર-19 મહિલા ટી20 વર્લ્ડ કપમાં અફઘાનિસ્તાન ટીમનો સમાવેશ કરવામાં આવ્યો નથી. જ્યારે, ઓસ્ટ્રેલિયા વિ અફઘાનિસ્તાન વનડે શ્રેણી વિશે વાત કરીએ તો, તે આઈસીસી વનડે સુપર લીગ હેઠળ રમવાની હતી. એટલે કે વિજેતા ટીમને વનડે વર્લ્ડ કપ હેઠળ યોજાનારી આઈસીસી વનડે સુપર લીગના પોઈન્ટ મળવાના હતા. પરંતુ હવે જ્યારે ઓસ્ટ્રેલિયાએ આ ક્રિકેટને રદ્દ કરી દીધું છે, તો અફઘાનિસ્તાનના ખાતામાં સિરીઝના 30 ટકા પોઈન્ટ ઉમેરાશે.
