જો બિડેનના તાઈવાન પરના નિવેદનથી ચીન રઘવાયું થયુ, કહ્યું- પરિણામો ગંભીર આવશે
અમેરિકા અને ચીન વચ્ચે તણાવ વધી રહ્યો છે. યુએસ પ્રમુખ જો બિડેનના તાજેતરના નિવેદનથી સંબંધો વધુ બગડવાની તૈયારીમાં છે. બિડેને કહ્યું કે જો ચીન તાઈવાન પર હુમલો કરવાનો પ્રયાસ કરશે તો અમેરિકા તેનું રક્ષણ કરશે. ચીન તાઈવાન પર દાવો કરે છે.
સીબીએસ ન્યૂઝ પર પ્રસારિત 60 મિનિટના કાર્યક્રમમાં, બિડેનને પૂછવામાં આવ્યું કે જો ચીને તાઈવાન પર હુમલો કર્યો, તો શું અમેરિકન દળો, અમેરિકન પુરુષો અને સ્ત્રીઓ તેની સુરક્ષા કરશે? બિડેને આનો જવાબ હામાં આપ્યો. સીબીએસ ન્યૂઝે અહેવાલ આપ્યો છે કે ઇન્ટરવ્યુ પછી, વ્હાઇટ હાઉસે કહ્યું કે યુએસ નીતિમાં કોઈ ફેરફાર કરવામાં આવ્યો નથી.
ચીને દરિયામાં મિસાઈલ છોડી હતી
આ નીતિ હેઠળ અમેરિકાનું માનવું છે કે તાઈવાનનો મુદ્દો શાંતિપૂર્ણ રીતે ઉકેલવો જોઈએ, પરંતુ નીતિમાં એ સ્પષ્ટ નથી કરવામાં આવ્યું કે જો ચીન હુમલો કરે તો અમેરિકી દળો મોકલી શકાય કે નહીં. બિડેનનું નિવેદન એવા સમયે આવ્યું છે જ્યારે ચીનના રાષ્ટ્રપતિ શી જિનપિંગની સરકારે તાઈવાનને સમુદ્રમાં મિસાઈલ છોડીને અને આસપાસના વિસ્તારોમાં ફાઈટર પ્લેન ઉડાવીને ધમકી આપવાનો પ્રયાસ કર્યો છે. તાજેતરમાં, યુએસ હાઉસ ઓફ રિપ્રેઝન્ટેટિવના સ્પીકર નેન્સી પેલોસી સહિત અનેક રાજકીય હસ્તીઓએ તાઈવાનની મુલાકાત લીધી હતી, જેના પછી ચીન વધુ ગુસ્સે થયું હતું.
આ બિલ પર ચીન ગુસ્સે છે
તાજેતરમાં, ચીને તાઈવાનને સંરક્ષણ સહયોગ વધારવા સંબંધિત બિલને યુએસ સેનેટની મંજૂરી પર નારાજગી વ્યક્ત કરી હતી. ચીનના વિદેશ મંત્રાલયે અમેરિકા પર ‘વન-ચાઈના’ના સિદ્ધાંતને લઈને તેની પ્રતિબદ્ધતાનું ઉલ્લંઘન કરવાનો અને ચીનની આંતરિક બાબતોમાં દખલ કરવાનો આરોપ લગાવ્યો છે.
‘ગંભીર પરિણામો’
ચીનના વિદેશ મંત્રાલયના પ્રવક્તા માઓ નિંગે કહ્યું કે, વન-ચાઈના નીતિ ચીન-અમેરિકા સંબંધોનો રાજકીય આધાર છે. જો બિલ પર ચર્ચા, મંજૂર અથવા હસ્તાક્ષર થવાનું ચાલુ રહેશે, તો તે ચીન-યુએસ રાજકીય પાયાને હચમચાવી નાખશે. જ્યારે તાઈવાન સ્ટ્રેટના બંને દેશો વચ્ચેના સંબંધો, શાંતિ અને સ્થિરતાના દૃષ્ટિકોણથી ગંભીર પરિણામો આવશે.
2022 નો તાઇવાન નીતિ અધિનિયમ તાઇવાનની સુરક્ષા અને તેના સ્વ-નિર્ણયના અધિકાર માટે સમર્થનને મંજૂર કરે છે, અને જે હેઠળ યુએસ તાઇવાનની વિરોધી હસ્તક્ષેપ ક્ષમતાઓને વધારવા માટે અબજો ડોલરનું સંરક્ષણ ભંડોળ પૂરું પાડશે.