બોર્ડર સિક્યુરિટી ફોર્સ (BSF) એ ગુજરાતના ભુજમાં ખાડી વિસ્તારમાં 11 પાકિસ્તાની બોટ જપ્ત કરી છે. બુધવાર, 9 ફેબ્રુઆરીએ કોમન એરિયા હરામી નાળામાં પાકિસ્તાની ફિશિંગ બોટ અને માછીમારોની ઘૂસણખોરીની માહિતી મળી હતી. જે બાદ ડીઆઈજી બીએસએફ ભુજ દ્વારા તાત્કાલિક 300 ચોરસ કિલોમીટરમાં ફેલાયેલા વિસ્તારમાં વ્યાપક સર્ચ ઓપરેશન શરૂ કર્યું હતું.
જી.એસ. મલિક, આઈપીએસ, આઈજી BSF ગુજરાત ફ્રન્ટિયર વહેલી સવારે ગાંધીનગરથી કચ્છ પહોંચી ગયા હતા અને મોટા પાયે સર્ચ ઓપરેશનની વ્યક્તિગત દેખરેખ કરી રહ્યા છે. BSFએ અત્યાર સુધીમાં 11 પાકિસ્તાની ફિશિંગ બોટ જપ્ત કરી છે અને કમાન્ડોના 03 જૂથોને એરફોર્સ હેલિકોપ્ટર દ્વારા ત્રણ અલગ-અલગ દિશામાંથી મોકલવામાં આવ્યા છે જ્યાં પાકિસ્તાનીઓ છુપાયેલા છે. એવું કહેવામાં આવ્યું હતું કે અત્યંત ગીચ વિસ્તાર, મેન્ગ્રોવ્સ અને ભરતીના પાણી સૈનિકો માટે પડકારરૂપ છે, તેમ છતાં ઓપરેશન ચાલુ છે.
તાજેતરમાં, પાકિસ્તાની મેરીટાઇમ સિક્યુરિટી એજન્સીના સૈનિકોએ અરબી સમુદ્રમાં એક માછીમારી બોટ પર ગુજરાતના ઓફશોર વિસ્તારમાં ગોળીબાર કર્યો હતો, જેમાં ક્રૂ મેમ્બરમાંથી એકનું મોત થયું હતું અને અન્ય એક ઘાયલ થયો હતો. ગુજરાત સરકારે માર્ચ 2021માં વિધાનસભાને જણાવ્યું હતું કે રાજ્યના 345 માછીમારો પાડોશી દેશ પાકિસ્તાનની જેલમાં કેદ છે, જેમાંથી 248 માછીમારો છેલ્લા બે વર્ષમાં પકડાયા છે.
