છત્તીસગઢના મંત્રી ટીએસ સિંહ દેવનો દાવો: કોંગ્રેસ ગુજરાત વિધાનસભા ચૂંટણી જીતી શકે છે

અમદાવાદ: છત્તીસગઢના મંત્રી ટીએસ સિંહ દેવે ગુરુવારે જણાવ્યું હતું કે કોંગ્રેસ સત્તાધારી ભારતીય જનતા પાર્ટી (બીજેપી) ને હરાવીને ગુજરાતમાં આગામી વિધાનસભા ચૂંટણી જીતી શકે છે. સિંહ દેવ અને પૂર્વ કેન્દ્રીય મંત્રી મિલિંદ દેવરાને ગુજરાત ચૂંટણી માટે કોંગ્રેસના નિરીક્ષક તરીકે નિયુક્ત કરવામાં આવ્યા છે. રાજ્યમાં વિધાનસભાની ચૂંટણી ડિસેમ્બરમાં યોજાય તેવી શક્યતા છે.

સિંહ દેવ અને દેવરાએ દિવસ દરમિયાન અહીં ચૂંટણી વ્યૂહરચના ઘડવા માટે રાજ્યના પક્ષના વરિષ્ઠ નેતાઓ સાથે બેઠક યોજી હતી. સિંહ દેવે કહ્યું કે અહીં પહોંચ્યા પછી મને સમજાયું કે ગુજરાતની વાસ્તવિકતા બહારના લોકો સમક્ષ જે ચિત્ર રજૂ કરવામાં આવી રહ્યું છે તેનાથી અલગ છે. લોકો નારાજ છે. તેઓ પણ ભયમાં જીવી રહ્યા છે. ગુજરાતની જનતા હવે કંટાળી ગઈ છે અને સરકાર બદલવા માંગે છે.

તેમણે કહ્યું કે મેં જોયું છે કે કોંગ્રેસ અહીં ચૂંટણી જીતવાની સ્થિતિમાં છે. તેમણે આક્ષેપ કર્યો હતો કે, પ્રતિબંધ હોવા છતાં ગુજરાતમાં દર વર્ષે રૂ. 25,000 કરોડનો દારૂ વેચાય છે અને ભાજપ અને તેની સરકારના આશ્રય વિના આ શક્ય નથી. તેમણે સવાલ કર્યો હતો કે એન્ફોર્સમેન્ટ ડિરેક્ટોરેટ ગુજરાતમાં દારૂ અને ડ્રગ માફિયાઓ સામે શા માટે દરોડા પાડતું નથી?

દરેક લેટેસ્ટ News અને Videos માટે લાઈક કરો