આઝમગઢના કૌશામ્બી જિલ્લામાં કોર્ટે બળાત્કારનો ભોગ બનેલી સગીર સગર્ભાને ગર્ભપાતની મંજૂરી આપવાનો ઇનકાર કર્યો છે. બાળકી પર તેના કાકાએ બળાત્કાર ગુજાર્યો હતો. હવે પીડિતાના પેટમાં 24 સપ્તાહનું બાળક છે. પીડિતાએ સ્પેશિયલ જજ પોક્સો કોર્ટ અરવિંદ કુમારની કોર્ટમાં ગર્ભપાતની પરવાનગી માંગી હતી, જેને કોર્ટે નકારી કાઢી હતી. તેનું કારણ મેડિકલ રિપોર્ટમાં આપવામાં આવ્યું છે. મેડિકલ રિપોર્ટ અનુસાર પીડિતાના પેટમાં 24 અઠવાડિયાની પ્રેગ્નન્સી વધી રહી છે.
આવી સ્થિતિમાં ગર્ભપાતને કારણે તેનો જીવ જોખમમાં આવી શકે છે. જણાવી દઈએ કે કૌશામ્બી જિલ્લાના ચારવા વિસ્તારમાં રહેતી 13 વર્ષની સગીર છોકરી પર તેના સંબંધના કાકાએ બળાત્કાર ગુજાર્યો હતો. આરોપીઓની ધમકીથી ડરીને પીડિતાએ આ વાત કોઈને કહી ન હતી. તેણીને ખ્યાલ પણ ન હતો કે તે ગર્ભવતી થઈ ગઈ છે. જ્યારે બાળકીના શરીરમાં બદલાવ આવ્યો ત્યારે પરિવારના સભ્યોએ તેને આ વિશે પૂછ્યું. પરિવારના કહેવા પર પીડિતાએ પરિવારજનોને સમગ્ર ઘટના જણાવી. પરિવારના સભ્યોને દીકરીના જાતીય શોષણની જાણ પણ ન હતી. અચાનક આ બધું જાણીને પરિવારજનો ચોંકી ઉઠ્યા હતા. તેઓએ આરોપીઓને સજા આપવાનું નક્કી કર્યું.
આ મામલામાં પીડિતાના ચારવા પોલીસ સ્ટેશનમાં આરોપીઓ વિરુદ્ધ FIR દાખલ કરવામાં આવી હતી. પોલીસે પીડિત યુવતીની મેડિકલ તપાસ કરાવી તેમજ આરોપીની ધરપકડ કરીને તેને જેલમાં મોકલી આપ્યો. આ મામલો પોક્સો કોર્ટના સ્પેશિયલ જજની કોર્ટમાં પેન્ડિંગ છે. સગીર બાળકીના પિતાએ તાજેતરમાં જ પીડિતાના ગર્ભપાત માટે કોર્ટમાં અરજી કરી હતી.
કોર્ટના આદેશ પર સીએમઓએ મેડિકલ બોર્ડની રચના કરી અને ટેસ્ટ રિપોર્ટ કોર્ટ સમક્ષ રજૂ કર્યો. રિપોર્ટમાં તે 24 સપ્તાહની ગર્ભવતી હોવાની પુષ્ટિ થઈ હતી. કોર્ટે તેને ગંભીરતાથી લીધો હતો. અરજીની સુનાવણી દરમિયાન કોર્ટને જાણવા મળ્યું કે જો ગર્ભપાત કરવામાં આવે તો બાળકીના જીવને ખતરો છે. બુધવારે કોર્ટે ગર્ભપાતની મંજૂરી આપવાનો ઇનકાર કર્યો હતો.
