વિશ્વ હિંદુ પરિષદ (VHP) એ શનિવારે માંગ કરી હતી કે સરકાર કુતુબ મિનાર સંકુલમાં પ્રાચીન મંદિરોનું પુનઃનિર્માણ કરે અને ત્યાં હિંદુ ધાર્મિક વિધિઓ ફરી શરૂ કરવાની મંજૂરી આપે. વીએચપીના રાષ્ટ્રીય પ્રવક્તા વિનોદ બંસલ અને સંગઠનના અન્ય નેતાઓએ સ્મારક સંકુલની મુલાકાત લીધા બાદ ઉપરોક્ત માંગણી કરી હતી.
સરકાર પાસે પુનઃનિર્માણની માંગ
જ્યારે કુતુબ મિનાર સંકુલની મુલાકાત વિશે પૂછવામાં આવ્યું ત્યારે બંસલે કહ્યું, “અમે સ્મારકના મુખ્ય ભાગોની મુલાકાત લીધી હતી અને હિંદુ દેવી-દેવતાઓની મૂર્તિઓની સ્થિતિ હૃદયદ્રાવક હતી. કુતુબ મિનાર 27 મંદિરોને તોડીને મેળવેલી સામગ્રીમાંથી બનાવવામાં આવ્યો હતો. અમે માંગ કરીએ છીએ કે ભૂતકાળમાં તોડી પાડવામાં આવેલ તમામ 27 મંદિરો ફરીથી બનાવવામાં આવે અને હિન્દુઓને ત્યાં પૂજા કરવાની છૂટ આપવામાં આવે.
વીએચપીનો દાવો છે કે કુતુબ મિનાર હતું મંદિર
વાસ્તવમાં, કેટલાક હિન્દુ સંગઠનો અને ભાજપના નેતાઓએ માંગ કરી છે કે કુતુબમિનારમાં રાખવામાં આવેલી ભગવાન ગણેશની મૂર્તિઓને યોગ્ય જગ્યાએ રાખવામાં આવે અને ત્યાં પૂજા કરવામાં આવે. દરમિયાન, શનિવારે વિશ્વ હિન્દુ પરિષદ (VHP)ના કેટલાક અધિકારીઓ કુતુબ મિનારની મુલાકાત લેવા પહોંચ્યા હતા. આ દરમિયાન VHPના નેતાઓએ સરકાર પાસે કુતુબ મિનારને હિંદુઓને સોંપવાની માંગ કરી હતી.
તેમણે દાવો કર્યો છે કે કુતુબ મિનાર કોઈ વિદેશી દ્વારા બનાવવામાં આવ્યો નથી, પરંતુ તે વિષ્ણુ મંદિરનો ગરુડ સ્તંભ છે, જેને વિષ્ણુ સ્તંભ તરીકે પણ ઓળખવામાં આવે છે. તે જ વિષ્ણુ મંદિરની સાથે, 27 હિંદુ અને જૈન મંદિરોને તોડી પાડવામાં આવ્યા હતા અને કુતુબ મિનાર સંકુલમાં મિનારો અને મસ્જિદ બનાવવામાં આવી હતી. જ્યાં આજે પણ સ્તંભો અને દિવાલોની મૂર્તિઓ સાક્ષી આપે છે કે આ મંદિર હતું.