ચોંકાવનારી ઘટના: દંપતીએ ભાઈ અને બહેનને દત્તક લીધા, પછી તેમના પર કર્યું યૌન શોષણ

દિલ્હીને અડીને આવેલા હરિયાણાના ગુરુગ્રામમાં એક શરમજનક કિસ્સો સામે આવ્યો છે. અહીં દત્તક દંપતીએ ભાઈ-બહેનનું યૌન શોષણ કર્યું હતું. ગુરુગ્રામના સેક્ટર-10માં રહેતા આરોપી દંપતીએ 30 માર્ચ 2022ના રોજ 2 વર્ષની બાળકી અને 4 વર્ષના છોકરાને દત્તક લીધા હતા. ત્યારપછી 12 જુલાઈ 2022ના રોજ તેઓ બંને બાળકોને પણ પાછા મૂકી ગયા હતા. ત્યાં મેડિકલ કરાવ્યું ત્યારે જાતીય શોષણ અને સતામણીનો ખુલાસો થયો હતો. કોલકાતામાં ઈન્ડિયન સોસાયટી ફોર રિહેબિટેટ સંસ્થા વતી દીપક સિંહાએ પોલીસને આ ફરિયાદ કરી છે. કોલકાતા પોલીસે શૂન્ય FIR નોંધી અને ફાઇલ ગુરુગ્રામ મોકલી હતી. તેના પર POCSO અને JJ એક્ટ હેઠળ સેક્ટર-10A પોલીસ સ્ટેશનમાં FIR નોંધવામાં આવી છે.

મળતી માહિતી મુજબ સેક્ટર-10માં રહેતા નીતિન શર્મા અને તેની પત્ની પર આરોપ લગાવવામાં આવ્યો છે. આરોપ છે કે આ દંપતીએ કોલકાતાના એક 2 વર્ષની છોકરી અને 4 વર્ષના છોકરાને દત્તક લીધા હતા. બંને બાળકો ભાઈ-બહેન છે. 30 માર્ચ 2022 ના રોજ દંપતીએ તેમને દત્તક લીધા અને ગુરુગ્રામ ગયા હતા. ત્યારબાદ 12 જુલાઈ 2022ના રોજ આ બાળકોને કોલકાતા પાછા મુકી દેવામાં આવ્યા હતા. બાળકોને શેલ્ટર હોમમાં પાછા મોકલતા પહેલા બોર્ડ દ્વારા તેમની મેડિકલ તપાસ કરવામાં આવી હતી. જેમાં યૌન શોષણ અને ઉત્પીડનનો મામલો સામે આવ્યો હતો.

ગુરુગ્રામ પોલીસે FIR નોંધી

કોલકાતાના રવીન્દ્ર સરોબર પોલીસ સ્ટેશનમાં આ મામલે ઝીરો એફઆઈઆર નોંધવામાં આવી હતી. ત્યાંથી હવે કેસની ફાઇલ ગુરુગ્રામ પોલીસને મોકલવામાં આવી હતી. જેના પર JJ એક્ટની કલમ 75, POCSO એક્ટની કલમ 10 અને અન્ય કલમો હેઠળ સેક્ટર-10A પોલીસ સ્ટેશનમાં FIR નોંધવામાં આવી છે.

કોલકાતા પોલીસનો સંપર્ક કરીને માહિતી માંગવામાં આવી છે

મહિલા એસઆઈ મુકેશે જણાવ્યું કે આ મામલે કોલકાતા પોલીસનો સંપર્ક કરીને કેટલીક માહિતી માંગવામાં આવી છે. માહિતી મળતાં જ આગળની કાર્યવાહી કરવામાં આવશે.