રશિયા-યુક્રેન વચ્ચે વધી રહેલા તણાવ બાદ હવે ઈરાન અને ઈરાક વચ્ચે પણ તણાવનું વાતાવરણ છે. રવિવારે ઇરાકના ઇરબિલ શહેરમાં યુએસ વાણિજ્ય દૂતાવાસની નજીક ઓછામાં ઓછી 12 મિસાઇલો પડી. અમેરિકી સંરક્ષણ વિભાગના અધિકારીઓનું કહેવું છે કે આ હુમલો પાડોશી દેશ ઈરાન તરફથી કરવામાં આવ્યો છે. આ હુમલામાં કોઈ જાનહાનિ થઈ નથી. ઇરાકી અધિકારીઓએ શરૂઆતમાં જણાવ્યું હતું કે ઇરાકના ઇરબિલ શહેરમાં અમેરિકી વાણિજ્ય દૂતાવાસ પર અનેક મિસાઇલો છોડવામાં આવી હતી.
બાદમાં, કુર્દીસ્તાનના ફોરેન મીડિયા ઓફિસના વડા, લોકે ગફરીએ કહ્યું કે કોઈપણ મિસાઈલ યુએસ ઈન્સ્ટોલેશન પર નથી પડી, પરંતુ કમ્પાઉન્ડની આસપાસના વિસ્તારોમાં પડી હતી. યુએસ ડિફેન્સ મિનિસ્ટ્રીના એક અધિકારીએ જણાવ્યું હતું કે હજુ સુધી એ સ્પષ્ટ નથી થયું કે કેટલી મિસાઇલો છોડવામાં આવી હતી અને તે ક્યાં પડી હતી. બીજા અધિકારીએ જણાવ્યું હતું કે યુએસ સરકારની કોઈ ઓફિસને નુકસાન થયું નથી અને એવા કોઈ સંકેત નથી કે લક્ષ્ય યુએસ કોન્સ્યુલેટ હતું.
ઇરાકી અને અમેરિકી અધિકારીઓએ નામ ન આપવાની શરતે આ માહિતી આપી હતી. ટેલિવિઝન ચેનલ કુર્દીસ્તાન 24, જે યુએસ વાણિજ્ય દૂતાવાસની નજીક ઓફિસ ધરાવે છે, તેણે હુમલા પછી તેની ઓફિસમાં કાચ અને કાટમાળના ટુકડાઓની તસવીરો બતાવી. ઈરાનના પ્રવક્તાએ ઈરબિલમાં થયેલા હુમલામાં ઈરાનની સંડોવણીના આરોપોને નકારી કાઢ્યા છે.
રાષ્ટ્રીય સુરક્ષા પર ઈરાનની સંસદીય સમિતિના પ્રવક્તા મહમૂદ અબ્બાસહેદે જણાવ્યું હતું કે આરોપોની પુષ્ટિ થઈ શકી નથી. “જો ઈરાન બદલો લેવાનું નક્કી કરે છે, તો તે ખૂબ જ ગંભીર અને મજબૂત હશે,” તેમણે એક સ્થાનિક સમાચાર વેબસાઈટને આપેલા ઈન્ટરવ્યુમાં જણાવ્યું હતું. ઈરાકી સુરક્ષા અધિકારીઓએ જણાવ્યું હતું કે હુમલામાં હાલમાં કોઈ જાનહાનિ થઈ નથી. આ હુમલાઓ મધ્યરાત્રિ પછી જ કરવામાં આવ્યા છે અને આ વિસ્તારમાં માળખાકીય સુવિધાઓને નુકસાન પહોંચાડ્યું છે.
અન્ય એક અધિકારીએ એમ પણ જણાવ્યું કે બેલેસ્ટિક મિસાઈલો ઈરાન તરફથી છોડવામાં આવી હતી. તેમણે કહ્યું કે આ મિસાઈલો ઈરાન દ્વારા નિર્મિત ફતેહ-110 છે અને કદાચ સીરિયામાં બે રિવોલ્યુશનરી ગાર્ડ્સની હત્યાના બદલામાં ફાયર કરવામાં આવી હતી. અન્ય અમેરિકી અધિકારીએ એક નિવેદનમાં જણાવ્યું હતું કે અમેરિકા “ઈરાકી સાર્વભૌમત્વ વિરુદ્ધ હુમલાઓ અને હિંસાના પ્રદર્શનની નિંદા કરે છે.”
નોંધપાત્ર રીતે, ઇરબિલના એરપોર્ટ સંકુલમાં તૈનાત અમેરિકી દળો ભૂતકાળમાં રોકેટ અને ડ્રોન હુમલાનો ભોગ બન્યા છે, જેના માટે અમેરિકી અધિકારીઓએ ઈરાન સમર્થિત જૂથોને જવાબદાર ઠેરવ્યા છે.