Jignesh Mevani: મેવાણીએ કહ્યું, જેલમાં જવાના ડરથી હાર્દિક વિચારધારા સાથે ચેડા કરી રહ્યો છે
કોંગ્રેસમાંથી રાજીનામું આપનાર હાર્દિક પટેલના નિવેદન પર વડગામથી અપક્ષ ધારાસભ્ય જીગ્નેશ મેવાણીએ તીખી પ્રતિક્રિયા આપી છે. એક સમયે મિત્ર ગણાતા હાર્દિકની આકરી ટીકા કરતાં તેમણે કહ્યું કે કોંગ્રેસમાંથી રાજીનામું આપ્યા બાદ હવે હાર્દિક પટેલ બેફામ નિવેદનો કરી રહ્યા છે. તેમને જેલ જવાનો ડર છે. તેથી તેઓ પોતાની વિચારધારા સાથે સમાધાન કરી રહ્યા છે.
શુક્રવારે પ્રદેશ કોંગ્રેસ મુખ્યાલયમાં પત્રકાર પરિષદમાં મેવાણીએ કહ્યું કે, વિચારધારા કપડાંની જેમ બદલાતી નથી. તમારી નસોમાં વિચારધારા વહેવી જોઈએ. ગુજરાત કોંગ્રેસના કાર્યકારી પ્રમુખ હાર્દિક પટેલે રાજીનામું આપ્યા બાદ કોંગ્રેસ પક્ષ અને તેના નેતાઓ સામે ઉગ્ર નિવેદનો આપ્યા હતા.
હાર્દિક પાસેથી આવી કોઈ અપેક્ષા નહોતી
મેવાણીએ કહ્યું કે, હાર્દિકે જે રીતે રાહુલ ગાંધી માટે ચિકન-સેન્ડવિચ પહોંચાડવા અંગે રાજ્યના નેતાઓની ચિંતા વિશે વાત કરી છે, તે તેની ખોટી વિચારસરણી દર્શાવે છે. તેણે કહ્યું કે હાર્દિક પાસેથી મને આવી અપેક્ષા નહોતી. આવા નિવેદનો કરીને તેમણે કોંગ્રેસના કાર્યકરોનું મનોબળ તોડવાનો પ્રયાસ કર્યો છે, પરંતુ પક્ષના કાર્યકરોનું મનોબળ તૂટશે નહીં.
મેવાણીના કહેવા પ્રમાણે, હાર્દિકે જે રીતે પાર્ટી છોડવાનો રસ્તો અપનાવ્યો તે સારો નહોતો. તેઓ પક્ષ છોડી શક્યા હોત. અલ્પેશ ઠાકોરે પાર્ટીમાંથી રાજીનામું આપતી વખતે આવું કશું કહ્યું ન હતું. દલિત નેતાના કહેવા પ્રમાણે, કોંગ્રેસે હાર્દિકને કાર્યકારી પ્રમુખ જેવું મોટું પદ આપ્યું હતું. તેમને ગુજરાત કે અન્ય રાજ્યોમાં સ્ટાર પ્રચારક બનાવ્યા. પ્રચાર માટે તેમને અલગ હેલિકોપ્ટર આપવામાં આવ્યું હતું.
