મથુરાની શાહી ઈદગાહ મસ્જિદ સાથે જોડાયેલા મામલામાં મુસ્લિમ પક્ષના વકીલે મોટી વાત કહી છે. તેમણે કહ્યું કે મંદિર ટ્રસ્ટે 1968ના જૂના કરાર સામે ક્યારેય વાંધો ઉઠાવ્યો નથી અને બહારના લોકો આ મામલે અરજીઓ દાખલ કરી રહ્યા છે. આ મામલે આજે સિવિલ કોર્ટમાં સુનાવણી હાથ ધરવામાં આવી હતી. કોર્ટે હાલ સુનાવણી 31 મે સુધી મુલતવી રાખી છે.
સુનાવણી પહેલા મીડિયા સાથે વાત કરતા મુસ્લિમ પક્ષના વકીલ તનવીર અહેમદે કહ્યું કે, મથુરા કેસમાં ઘણી અરજીઓ દાખલ કરવામાં આવી છે. તેમણે કહ્યું કે જિલ્લા ન્યાયાધીશે આ મામલો સિવિલ કોર્ટમાં ટ્રાન્સફર કર્યો કારણ કે અગાઉ તેને સાંભળ્યા વિના બરતરફ કરવામાં આવ્યો હતો.
મથુરાના શાહી ઇદગાહ ટ્રસ્ટના એડવોકેટ તનવીર અહેમદે કહ્યું કે, તે ખૂબ જ વિચિત્ર છે કે કૃષ્ણ જન્મભૂમિ ટ્રસ્ટ અને સંસ્થા (કૃષ્ણ જન્મભૂમિ ટ્રસ્ટ)એ હજુ સુધી આ મામલે કોઈ સ્ટેન્ડ નથી લીધું, જ્યારે હિંદુ અરજીકર્તાઓએ તેમને પક્ષકાર બનાવ્યા છે. જ્યારે અરજદારો મીડિયા સાથે વાત કરી રહ્યા છે, ત્યારે એવું લાગે છે કે તેઓ ટ્રસ્ટ વતી બોલી રહ્યા છે.
મથુરા કોર્ટે અરજી સ્વીકારી હતી
ગયા અઠવાડિયે 19 મેના રોજ મથુરા કોર્ટમાં આ મામલે સુનાવણી થઈ હતી. મથુરા કોર્ટે ઇદગાહ સંબંધિત આ અરજીને સાંભળવા યોગ્ય માનીને સ્વીકારી લીધી હતી. કોર્ટે કહ્યું હતું કે આ મામલાની સુનાવણી સિવિલ કોર્ટ કરશે.
આ અરજીમાં કૃષ્ણ જન્મભૂમિ પાસે આવેલી શાહી ઈદગાહ મસ્જિદને હટાવવાની માંગ કરવામાં આવી છે. અરજીમાં કહેવામાં આવ્યું હતું કે શાહી ઇદગાહ મસ્જિદ કૃષ્ણ જન્મભૂમિ પર બનેલી છે તેથી તેને હટાવી દેવી જોઇએ.
આ કેસમાં એડવોકેટ રંજના અગ્નિહોત્રી (જે પોતે કૃષ્ણના ભક્ત હોવાનો દાવો કરે છે) સહિત 6 અરજદારો છે. આ અપીલ વર્ષ 2020માં દાખલ કરવામાં આવી હતી, જેમાં શાહી ઇદગાહની જમીનની માલિકી મેળવવાનો દાવો કરવામાં આવ્યો હતો.
શું છે મથુરા કૃષ્ણ જન્મભૂમિ અને ઇદગાહ વિવાદ?
તે 13.37 એકર જમીનની માલિકીનો વિવાદ છે. જેમાં 10.9 એકર જમીન શ્રી કૃષ્ણ જન્મસ્થાન પાસે અને 2.5 એકર જમીન શાહી ઇદગાહ મસ્જિદ પાસે છે. સુપ્રીમ કોર્ટના એડવોકેટ હરિશંકર જૈન, વિષ્ણુ શંકર જૈન, રંજના અગ્નિહોત્રી દ્વારા દાવો દાખલ કરવામાં આવ્યો હતો.
હિન્દુઓ દાવો કરે છે કે ઔરંગઝેબે કાશી અને મથુરામાં મંદિર તોડીને ત્યાં મસ્જિદ બનાવી હતી. ઔરંગઝેબે 1669માં કાશીમાં વિશ્વનાથ મંદિર તોડી પાડ્યું હતું અને 1670માં મથુરામાં ભગવા કેશવદેવ મંદિરને તોડી પાડવાનું ફરમાન બહાર પાડ્યું હતું.
ત્યારબાદ કાશીમાં જ્ઞાનવાપી મસ્જિદ અને મથુરામાં શાહી ઈદગાહ મસ્જિદ બનાવવામાં આવી. આ વિવાદની ચર્ચા ગયા વર્ષે મથુરામાં શરૂ થઈ હતી, જ્યારે અખિલ ભારતીય હિંદુ મહાસભાએ ઈદગાહ મસ્જિદની અંદર ભગવાન કૃષ્ણની મૂર્તિ સ્થાપિત કરવાની અને તેનો જલાભિષેક કરવાની જાહેરાત કરી હતી. જો કે હિન્દુ મહાસભા આમ કરી શકી ન હતી. આ પછી ઉત્તર પ્રદેશની ચૂંટણીમાં ‘મથુરા કી બારી હૈ…’ જેવા નારા પણ લાગ્યા હતા.
