યુનિક આઈડેન્ટિફિકેશન ઓથોરિટી ઓફ ઈન્ડિયા (UIDAI) ટૂંક સમયમાં હોસ્પિટલમાં જન્મેલા નવજાત શિશુને આધાર કાર્ડ આપવાની તૈયારી કરી રહ્યું છે. આ માટે હોસ્પિટલોને ટૂંક સમયમાં જ આધાર એનરોલમેન્ટની સુવિધા આપવામાં આવશે. જેના દ્વારા તેઓ તરત જ નવજાત બાળકોનું આધાર કાર્ડ બનાવશે.
UIDAIના CEO સૌરભ ગર્ગે કહ્યું કે UIDAI નવજાત શિશુઓને આધાર નંબર આપવા માટે જન્મ રજીસ્ટ્રાર સાથે જોડાણ કરવાનો પ્રયાસ કરી રહ્યું છે. અત્યાર સુધી દેશમાં પુખ્ત વસ્તીના 99.7 ટકા લોકોને આધાર નંબર આપવામાં આવ્યા છે. આ માટે લગભગ 131 કરોડ વસ્તીની નોંધણી કરવામાં આવી છે અને હવે અમારો પ્રયાસ નવજાત બાળકોની નોંધણી કરવાનો છે.
ગર્ગે વધુમાં કહ્યું કે દેશમાં દર વર્ષે 2 થી 2.5 કરોડ બાળકોનો જન્મ થાય છે. અમે તેમને આધારમાં નોંધણી કરવાની પ્રક્રિયામાં છીએ. તેમણે કહ્યું કે બાળકના જન્મ સમયે એક ફોટોગ્રાફ ક્લિક કરવાના આધારે આધાર કાર્ડ ઉપલબ્ધ કરાવવામાં આવશે. UIDAI સીઇઓ કહ્યું કે અમે પાંચ વર્ષની નીચેના બાળકોના બાયોમેટ્રિક્સ એકત્રિત કરતાં નથી. પાંચ વર્ષની ઉંમર પાર કર્યા બાદ બાળકના બાયોમેટ્રિક્સ લેવામાં આવશે.
ગર્ગે વધુમાં કહ્યું કે, અમે અમારી સમગ્ર વસ્તીને આધાર નંબર આપવાનો પ્રયાસ કરી રહ્યા છીએ. ગયા વર્ષે, અમે દૂરના વિસ્તારોમાં 10,000 કેમ્પ લગાવ્યા હતા. જ્યાં તેમને કહેવામાં આવ્યું હતું કે ઘણા લોકો પાસે આધાર નંબર નથી. આ પછી, લગભગ 30 લાખ લોકોએ આધાર માટે નોંધણી કરાવી. ગર્ગે વધુમાં કહ્યું પહેલા આધાર નંબર વર્ષ 2010માં ફાળવવામાં આવ્યો હતો. શરૂઆતમાં અમારું ધ્યાન શક્ય તેટલા વધુ લોકોની નોંધણી કરવાનું હતું અને હવે અમે અપડેટ કરવા પર ધ્યાન કેન્દ્રિત કર્યું છે.