રશિયાના એક ગામમાં આકાશામાંથી રહસ્યમય રીતે હજારો કાગડા ટપોટપ જમીન પર પડ્યા હોવાની ઘટના સામે આવી છે. જેને જોઈને ગ્રામવાસીઓ આઘાત લાગ્યો હતો. નોવોસિબિર્સ્ક વિસ્તારના ઉસ્ત-તાર્કામાં સ્થાનિકોના જણાવ્યા મુજબ તેમના ગામમાં કાગડાઓના મૃતદેહો જોઈને લોકો ભયભીત થઈ ગયા હતા.
એક નામી ચેનલ મુજબ, આકાશમાંથી કાગડાઓના મૃતદેહો પડતા જોઈને ગામવાસીઓ પણ ચિંતિત થઈ ગયા હતા. ઉસ્ત-તાર્કાના વેટરનરી વિભાગના મુખ્ય ફિઝિશિયન સર્ગેઈ કુઝલીઆકિને કહ્યું હતું કે, આટલી મોટી સંખ્યામાં પક્ષીના મોતનું કારણ શું છે તે શોધવા માટે ટેસ્ટ શરૂ કરી દેવાયા છે.
તેમણે જણાવ્યું છે કે, અન્ય પક્ષીઓ કે પ્રાણીઓને કોઈ નુકસાન પહોંચ્યું નથી. માત્ર કાગડાઓમાં જ આવું જોવા મળ્યું છે. તેમણે જણાવ્યું હતું કે, હું 1975 થી ડોક્ટર તરીકે કામ કરી રહ્યો છું અને મે પ્રથમ વખત આવી ઘટના જોઈને છે. મને ખુબ આઘાત લાગ્યો છે.
જ્યારે કાગડાના મૃતદેહોમાંથી કેટલાક મૃતદેહોને તપાસ માટે સ્થાનિક લેબોરેટરીમાં મોકલી દેવામાં આવ્યા હતા જ્યારે બાકીનાને સળગાવી દેવાયા હતા. ઉલ્લેખનીય છે કે, આ અગાઉ પણ આવી કેટલીક ઘટનાઓ સામે આવી છે. 10 વર્ષ અગાઉ અર્કાનસાસના આકાશમાંથી હજારો પક્ષીઓ નીચે પડી આવ્યા હતા અને નજીકની નદીમાં 1,00,000 જેટલી ડ્રમ ફિશ મૃત હાલતમાં પણ મળી આવી હતી.
નિષ્ણાતો મુજબ કહેવામાં આવ્યું છે કે, ઘણી પ્રજાતિઓમાં આવી ઘટનાઓ બનતી રહે છે જેમાં હજારોની સંખ્યામાં એક સાથે જ મોત થાય છે. તેમ છતાં પ્રત્યેક ઘટના માટે અલગ-અલગ કારણો રહેલા હોય છે. જેમાં રોગ, ઝેર આપવું, અયોગ્ય વાતાવરણ, ઓક્સિજનની ઉણપ, ભૂખ, માઈગ્રેશનમાં થયેલી ભૂલ જેવા અલગ-અલગ કારણો જવાબદાર રહેતા હોઈ છે.