સાઉદી અરેબિયાની સરકાર વિશ્વનું સૌપ્રથમ નોન-પ્રોફિટ સિટી બનાવવા જઈ રહી છે. સાઉદી અરેબિયાના ક્રાઉન પ્રિન્સ મોહમ્મદ બિન સલમાને ગયા વર્ષે આની જાહેરાત કરી હતી. સરકારે આ નોન-પ્રોફિટ સિટીનો માસ્ટર પ્લાન પણ બહાર પાડ્યો છે. યુવાનોમાં નેતૃત્વની ગુણવત્તા કેળવવા માટે આ શહેરમાં ઘણી રસપ્રદ સુવિધાઓ હશે.
આ શહેરનું નામ પ્રિન્સ મોહમ્મદ બિન સલમાન નોન-પ્રોફિટ સિટી હશે. આ શહેર માનવ-કેન્દ્રિત, અદ્યતન ડિજિટલ મેટ્રોપોલિસ, ટકાઉ અને રાહદારીઓ માટે અનુકુળ હશે. તેના કુલ વિસ્તારના લગભગ 44% ભાગ ગ્રીન ઓપન સ્પેસ માટે ફાળવવામાં આવશે.
‘મોડલ તરીકે કરશે કામ’
શહેરના ચીફ એક્ઝિક્યુટિવ, ડેવિડ હેનરીએ સમજાવ્યું હતું કે શહેરનો હેતુ નવીન, શૈક્ષણિક અને સર્જનાત્મક સાહસો વિકસાવવા માટે મુખ્ય ઇકોસિસ્ટમ અને વૈશ્વિક કેન્દ્રની સ્થાપના કરીને સાઉદી યુવા પ્રતિભાને પ્રોત્સાહન આપવાનો છે. તો સરકારનું કહેવું છે કે આ શહેર વૈશ્વિક સ્તરે બિન-લાભકારી ક્ષેત્રના વિકાસ માટે એક મોડેલ તરીકે કામ કરશે. તે યુવાનો, સ્વૈચ્છિક જૂથો તેમજ બિન-લાભકારી સંસ્થાઓને પણ આકર્ષિત કરશે.
શહેરમાં ઉપલબ્ધ થશે આ સુવિધાઓ
નોન-પ્રોફિટ સિટી વિશે માહિતી આપતા, મોહમ્મદ બિન સલમાન ફાઉન્ડેશને જણાવ્યું હતું કે આ શહેરની સીમાઓ પશ્ચિમ રિયાધમાં લગભગ 3.4 ચોરસ કિલોમીટરના વિસ્તારને આવરી લેશે. આ શહેર નવીનતા, સાહસિકતા અને બિન-લાભકારી કાર્યમાં ભાવિ નેતાઓ બનાવવામાં મદદ કરશે. માસ્ટર પ્લાનમાં 6,000 એપાર્ટમેન્ટ્સ, 500 વિલા અને ટાઉનહાઉસ સાથે મનોરંજન, ફૂડ, રિટેલનો સમાવેશ થાય છે. શહેરમાં શૈક્ષણિક, કોલેજ, શાળા, કોન્ફરન્સ સેન્ટર, સાયન્સ મ્યુઝિયમ, ક્રિએટીવ સેન્ટર જેવી સુવિધાઓ ઉપલબ્ધ થશે.
આવશે દુનિયાભરમાંથી પ્રોફેશનલ્સ
ક્રાઉન પ્રિન્સ દ્વારા જણાવ્યા મુજબ, તેમના ફાઉન્ડેશનના ઉદ્દેશ્યને પ્રાપ્ત કરવામાં મદદ કરવા માટે આ પ્રકારનું પ્રથમ નોન-પ્રોફિટ સિટી હશે. ‘મોહમ્મદ બિન સલમાન મિસ્ક’ ફાઉન્ડેશનનો ધ્યેય નોન-પ્રોફિટ કાર્ય વગેરેને વ્યાખ્યાયિત કરીને નવીનતા, ઉદ્યોગસાહસિકતા અને ભાવિ-લાયક નેતાઓને પ્રોત્સાહિત કરવાનો છે. કહેવામાં આવી રહ્યું છે કે દુનિયાભરના પ્રોફેશનલ્સને અહીં બોલાવવામાં આવશે અને તેમને નવી શોધ કરવા માટે પ્રેરિત કરવામાં આવશે.