BCCIએ પસંદગીકારોને પૂછ્યા આ અઘરા સવાલો, પછી આખી પસંદગી સમિતિને હટાવી નાંખી

ભારતીય ક્રિકેટ કંટ્રોલ બોર્ડે એક મોટો નિર્ણય લેતા ચેતન શર્માની અધ્યક્ષતાવાળી પસંદગી સમિતિને હટાવી દીધી છે. BCCIએ પસંદગીકારના પદ માટે 28 નવેમ્બર સુધીમાં નવી અરજીઓ માંગી છે. બીસીસીઆઈએ પસંદગીકારોને ઘણા અઘરા પ્રશ્નો પૂછ્યા હતા, જે તેમને હટાવવાનું કારણ બન્યા છે. ચાલો જાણીએ એ કારણો વિશે…

સતત 2 વર્લ્ડ કપમાં 10 વિકેટથી હાર

ટી-20 વર્લ્ડ કપ 2022માં ભારતીય ટીમ સારૂ પ્રદર્શન કરી શકી નથી. ટીમ ઈન્ડિયાને સેમીફાઈનલ મેચમાં ઈંગ્લેન્ડ સામે 10 વિકેટે હારનો સામનો કરવો પડ્યો હતો. આ મેચમાં ભારતીય બોલરો અને બેટ્સમેનો ખરાબ રીતે ફ્લોપ જોવા મળ્યા હતા. ટી-20 વર્લ્ડ કપ 2021માં પણ વિરાટ કોહલીની કેપ્ટન્સીમાં ભારતને પાકિસ્તાન સામે 10 વિકેટે હારનો સામનો કરવો પડ્યો હતો.

કેએલ રાહુલ ફ્લોપ થયા પછી પણ અડગ રહ્યો

ટી-20 વર્લ્ડ કપ 2022માં કેએલ રાહુલ ખરાબ રીતે ફ્લોપ થયો હતો. જ્યારે પણ ટીમ ઈન્ડિયાને તેની પાસેથી મોટી ઈનિંગની આશા હતી તે વહેલો આઉટ થઈ ગયો અને પેવેલિયન પરત ફર્યો. તે મોટી મેચોમાં અસફળ સાબિત થયો હતો. તેણે ટી-20 વર્લ્ડ કપ 2022ની 6 મેચમાં 128 રન બનાવ્યા છે. સેમિફાઇનલ મેચમાં તેના બેટમાંથી માત્ર 5 રન નીકળ્યા હતા. ખરાબ પ્રદર્શન બાદ પણ તે ટીમમાં રહ્યો હતો.

ઘણા કેપ્ટનો અજમાવ્યા

ટી-20 વર્લ્ડ કપ 2021 બાદ વિરાટ કોહલીએ ભારતીય ટીમની કેપ્ટનશીપ છોડી દીધી હતી. આ પછી રોહિત શર્માએ ટીમ ઈન્ડિયાની કમાન સંભાળી હતી પરંતુ પસંદગીકારોએ તેને મહત્વપૂર્ણ પ્રવાસ પર આરામ આપ્યો અને તેની જગ્યાએ અન્ય કેપ્ટનને નિયુક્ત કર્યો. રિષભ પંતને સાઉથ આફ્રિકા સિરીઝમાં હાર્દિક પંડ્યાને નેધરલેન્ડ સિરીઝમાં અને કેએલ રાહુલને ઝિમ્બાબ્વે પ્રવાસમાં કેપ્ટન બનાવવામાં આવ્યો હતો. ઇંગ્લેન્ડ સામે રમાયેલી એકમાત્ર ટેસ્ટ મેચમાં પણ જસપ્રીત બુમરાહને ભારતીય ટીમની કમાન સોંપવામાં આવી હતી. છેલ્લા એક વર્ષમાં પસંદગીકારોએ 8 કેપ્ટનને અજમાવ્યા.

દરેક ટુર્નામેન્ટમાં અલગ-અલગ ટીમ મોકલી

છેલ્લા એક વર્ષમાં ભારતે મોટાભાગના દેશોની મુલાકાત લીધી છે. જ્યાં અલગ-અલગ ટીમો મોકલવામાં આવી હતી. ઝિમ્બાબ્વે અને વેસ્ટ ઈન્ડિઝના પ્રવાસ પર સંપૂર્ણપણે અલગ ટીમો મોકલવામાં આવી હતી. ત્યાં જ અવેશ ખાન અને રવિ બિશ્નોઈને એશિયા કપમાં જગ્યા મળી હતી પરંતુ તેઓ ટી-20 વર્લ્ડ કપ 2022માંથી બહાર થઈ ગયા હતા. એશિયા કપ 2022માં સુપર-4 મેચમાં ટીમ ઈન્ડિયાને પાકિસ્તાન અને શ્રીલંકા સામે હારનો સામનો કરવો પડ્યો હતો અને ટીમ ઈન્ડિયા ફાઈનલમાં પણ પહોંચી શકી નહોતી.

ઈજાગ્રસ્ત ખેલાડીઓને ટીમમાં કેમ પસંદ કરવામાં આવ્યા?

જસપ્રીત બુમરાહ દક્ષિણ આફ્રિકા શ્રેણીમાં ભારતીય ટીમમાં પરત ફર્યો છે. પરંતુ તે સંપૂર્ણ રીતે ફિટ નહોતો. તેમ છતાં તેને ટીમમાં લેવામાં આવ્યો હતો. આ પછી તે ઇજાને કારણે સમગ્ર ટી-20 વર્લ્ડ કપમાંથી બહાર થઈ ગયો હતો. હર્ષલ પટેલને આખા ટી-20 વર્લ્ડ કપમાં એક પણ તક મળી નથી. શું હર્ષલ પટેલ સંપૂર્ણ ફિટ ન હતો? આ પછી રિઝર્વ ખેલાડીઓમાં પસંદગી પામેલા દીપક ચહરને પણ ઈજા થઈ હતી. ચીફ સિલેક્ટર ચેતન શર્મા ટીમ ઈન્ડિયા સાથે દરેક પ્રવાસ પર જતા હતા પરંતુ ત્યાંથી તેઓ ટેલેન્ટ હન્ટ તરીકે શોધ કરીને કોઈ નવા ખેલાડીને લાવી શક્યા નહોતા.

દરેક લેટેસ્ટ News અને Videos માટે લાઈક કરો