વિશ્વના સૌથી અમીર લોકોનું એક જૂથ ખજાનાની શોધમાં ઘણા પૈસાનું રોકાણ કરી રહ્યું છે. આ યાદીમાં બિલ ગેટ્સ, એમેઝોનના માલિક જેફ બેઝોસ, ઉદ્યોગપતિ અને રાજકારણી માઈકલ બ્લૂમબર્ગ જેવા અબજોપતિઓના નામ સામેલ છે. ટ્રેઝર હન્ટ માટે ટ્રાન્સમિટરથી સજ્જ હેલિકોપ્ટરનો પણ ઉપયોગ કરવામાં આવી રહ્યો છે.
ગ્રીનલેન્ડના પશ્ચિમ કિનારે ખજાનાની શોધ હાથ ધરવામાં આવી રહી છે. ગ્રીનલેન્ડ એક સ્વ-શાસિત દેશ છે, પરંતુ તે મુખ્યત્વે ડેનમાર્ક દ્વારા નિયંત્રિત છે. જો કે, આ દેશ ક્ષેત્રફળની દ્રષ્ટિએ વિશ્વનો 12મો સૌથી મોટો દેશ છે. પરંતુ તેના 2 મિલિયન ચોરસ કિલોમીટર વિસ્તારમાં ખડકો અને બરફ છે.
આબોહવા સંકટને કારણે ગ્રીનલેન્ડના બર્ફીલા પર્વતો ખૂબ જ ઝડપથી પીગળી રહ્યા છે. સદીઓથી બરફ નીચે દટાયેલા કેટલાક વિસ્તારો બહાર આવ્યા છે. આ આપત્તિ રોકાણકારો અને ખાણકામ કંપનીઓ માટે મોટી તક લઈને આવી છે જેઓ ગ્રીન એનર્જી ટ્રાન્ઝિશનમાં મદદ કરવા માટે મૂલ્યવાન સામગ્રીની શોધમાં છે.
નિકલ અને કોબાલ્ટ સ્ટોકમાં હોઈ શકે છે
બિલ ગેટ્સથી લઈને જેફ બેઝોસ સુધીના ઘણા અબજોપતિઓ માને છે કે ગ્રીનલેન્ડના ડિસ્કો આઈલેન્ડ અને નુસુઆક પેનિનસુલાની ટેકરીઓ અને ખીણોની નીચે કીમતી ચીજવસ્તુઓના થાપણો છે. તેની મદદથી અબજો ઈલેક્ટ્રિક વાહનો ચલાવી શકાશે.
સીએનએન સાથેની વાતચીતમાં, કોબોલ્ડ મેટલ્સના સીઇઓ, કર્ટ હાઉસે કહ્યું – અમે એવા ખજાનાની શોધમાં છીએ જે નિકલ અને કોબાલ્ટનો વિશ્વનો સૌથી મોટો અથવા બીજો સૌથી મોટો ભંડાર હશે.
અબજોપતિઓનું એક જૂથ કોબોલ્ડ મેટલ્સને નાણાકીય સહાય પૂરી પાડી રહ્યું છે. કંપનીના પ્રતિનિધિઓએ જણાવ્યું કે કોબોલ્ડ મેટલ્સ એ કેલિફોર્નિયા સ્થિત સ્ટાર્ટઅપ છે અને કંપની ખનિજોની શોધ કરે છે.
ગ્રીનલેન્ડમાં, આ કંપની બ્લુજે માઇનિંગ સાથે મળીને દુર્લભ અને કિંમતી ધાતુઓની શોધ કરી રહી છે. આ ધાતુઓ ઇલેક્ટ્રિક વાહનો અને નવીનીકરણીય ઉર્જાનો સંગ્રહ કરવા માટે રચાયેલ મોટી બેટરીઓ બનાવવા માટે જરૂરી છે.
30 ભૂસ્તરશાસ્ત્રીઓ, ભૂ-ભૌતિકશાસ્ત્રીઓ, રસોઈયા, પાઇલોટ અને મિકેનિક્સ ખજાનાની શોધમાં રોકાયેલા છે. ક્રૂ માટીના નમૂના લઈ રહ્યું છે, ટ્રાન્સમીટર-માઉન્ટેડ ડ્રોન અને હેલિકોપ્ટર દ્વારા ઇલેક્ટ્રોમેગ્નેટિક ક્ષેત્રની શોધ કરવામાં આવી રહી છે. જેથી જમીનની અંદર હાજર વિવિધ ખડકાળ સપાટીઓ શોધી શકાય.
આ લોકો આર્ટિફિશિયલ ઈન્ટેલિજન્સનો ઉપયોગ કરીને ખજાનો ક્યાં છુપાયેલો છે તે જગ્યા શોધવાનો પ્રયાસ કરી રહ્યા છે, જેથી કરીને તેઓ તેને ખોદીને બહાર કાઢી શકે.
