છેલ્લા ઘણા દિવસો થી નિઝામ અને પાકિસ્તાન વચ્ચે કાયદાકીય લડાઈ ચાલી રહી હતી જેનો આજે અંત આવ્યો છે.હૈદરાબાદના સાતમાં નિઝામને લઈને છેલ્લા 70 વર્ષથી પાકિસ્તાન સામે ચાલી રહેલી કાયદાકિય લડાઈમાં અંતે ભારતનો વિજય થયો છે. લંડનની નેટવેસ્ટ બેન્કમાં નિઝામના 35 મિલિયન પાઉન્ડ હતા જે હવે તેમના વંશજોને મળશે. જોકે, હૈદરાબાદના નિઝામ તેની ભપકાદાર અને ભવ્ય જીવનશૈલી માટે જાણીતા હતા. તેઓ 50 મિલિયન પાઉન્ડનો હિરો (ડાયમન્ડ) પેપરવેટ તરીકે ઉપયોગમાં લેતા હતા. ક્વિન જ્યારે 1947માં પ્રિન્સ ફિલિપને પરણ્યા હતા ત્યારે નિઝામે તેમને એક ડાયમંડ નેકલેસ ગિફ્ટમાં આપ્યો હતો.ડેઈલી મેઈલમાં પ્રકાશિત અહેવાલ પ્રમાણે હૈદરાબાદના નિઝામ પાસે અઢળક સંપત્તિ હતી.
તેમની પાસે અત્યંત કિંમતી દાગીના અને અમૂલ્ય રત્નો પણ હતા. તેમની પાસે 185 કેરેટનો એક ડાયમંડ હતો જેનું કદ શાહમૃગના ઈંડા જેટલી હતી અને તેની કિંમત 50 મિલિયન પાઉન્ડ હતી.તેમને તેના પિતાના ખજાનામાંથી આ હિરો મળ્યો હતો જેનો તેઓ પેપરવેઈટ તરીકે ઉપયોગ કરતા હતા. હૈદરાબાદના સાતમાં નિઝામ 1911માં શાસન પર આવ્યા હતા અને તાજેતરમાં લંડનની કોર્ટે આપેલા ચૂકાદા બાદ વિશ્વમાં તેમની ચર્ચા થઈ રહી છે. પાંચ ફૂટ ત્રણ ઈંચની ઊંચાઈ ધરાવતા નિઝામ ચેઈન સ્મોકર હતા. નિઝામનું નામ મિર ઓસ્માન અલી ખાન હતું. તેમણે 1911થી 1948 સુધી હૈદરાબાદમાં શાસન કર્યું હતું. ભારતના ભાગલા બાદ તેઓ પાકિસ્તાનમાં પોતાનું રાજ્ય ભેળવવા ઈચ્છતા હતા.
પરંતુ બાદ ભારતીય લશ્કરે તેમના રાજ્યનો કબજો લઈ લીધો હતો. 1967માં તેમનું નિધન થયું હતું. નિઝામને ડર હતો કે તેમની સામે બળવો થશે અને તેના ભયમાં તેમણે પોતાના મહેલના બગીચાઓમાં એક મોટી તાડપત્રી લગાવી હતી જેની નીચે તેમણે ઘણી બધી ટ્રકો ઊભી રાખી હતી. આ પ્રત્યેક ટ્રકમાં અમૂલ્ય ઝવેરાત અને સોનાની પાટો રાખવામાં આવી હતી. જેથી જ્યારે બળવો થાય ત્યારે તેઓ આ સંપત્તિ સાથે નાસી શકે. પરંતુ બાદમાં તેમને આમાંથી રસ ઊડી ગયો હતો અને ટ્રકો ત્યાં જ રહી ગઈ હતી. તેના ટાયર જમીનમાં ધસી ગયા હતા અને કટાઈ ગયા હતા.
પોતાની અંગત સુરક્ષા માટે તેમણે 3,000 નોર્થ આફ્રિકન બોડી ગાર્ડ્સનું લશ્કર રાખ્યું હતું. તેમણે પોતાના મહેલમાં લગાવવામાં આવેલા ઝુમ્મરોને સાફ રાખવા માટે 38 લોકો નોકરી પર રાખ્યા હતા. જ્યારે 28 લોકોને તેમણે પાણી ભરવા માટે રાખ્યા હતા. આ ઉપરાંત તેમણે કેટલાક કર્મચારીઓ રાખ્યા હતા તેમનું એકમાત્ર કામ તેમને ભાવતા અખરોટ તોડવાનું હતું. સંપૂર્ણ પણે શાસન સંભાળ્યા બાદ તેમણે પોતાનો દબદબો બનાવ્યો હતો.તેમના શાસન હેટળ 17 મિલિયન લોકો હતા અને તેમનું રાજ્ય ઈટાલી જેટલું હતું.
તેમણે પોતાના માટે રોલ્સ રોયસ વસાવી હતી.આ ઉપરાંત પોતાની ખાસ ભટ્ટી તૈયાર કરવી હતી જ્યાં તેમની મનપસંદ વિસ્કી તૈયાર થતી હતી. એટલું જ નહીં તેમણે એક જાઝ બેન્ડ બનાવ્યું હતું અને તે તેમનું મનપસંદ ગીત આઈ એમ ફોરએવર બ્લોઈંગ બબલ્સ સાંભળતા હતા. એક સમયે તેમની પાસે 100 મિલિયન પાઉન્ડનું સોનુ ચાંદી હતા અને 400 મિલિયન પાઉન્ડની જ્વેલરી હતી જેની વર્તમાન કિંમત 50 બિલિયન પાઉન્ડ થાય છે. આમ પણ જયારે રાજા રજવાડા હતા ત્યારે તેઓ ની સંપત્તિ ખુબજ વધારે હતી.