કર્મચારીના મૃત્યુ પર કંપનીઓ તેના પરિવારને થોડી આર્થિક મદદ કરે છે. કેટલીકવાર કંપનીના એક્ઝિક્યુટિવ મર્યાદાની બહાર પણ મદદ કરતા હોય છે. પરંતુ IDFC ફર્સ્ટ બેંકના મેનેજિંગ ડિરેક્ટર અને CEO વી વૈદ્યનાથને તેમના મૃત કર્મચારીના સંબંધીઓને એવી મદદ કરી છે કે લોકો તેમની ઉદારતાના વખાણ કર્યા વિના રહી શકતા નથી.
આપ્યા 2 કરોડ રૂપિયાના શેર
સુત્રો થકી મળતી માહિતી મુજબ સીઈઓ વી વૈદ્યનાથને તેમના એક કર્મચારીના મૃત્યુ પછી તેમના પરિવારને મદદ કરવા માટે તેમના 5 લાખ શેર આપ્યા હતા. આ શેરની કિંમત લગભગ 2 કરોડ રૂપિયા છે. IDFC ફર્સ્ટ બેંકે ગુરુવારે સ્ટોક એક્સચેન્જોને મોકલેલી નોટિસમાં આ માહિતી આપી છે. બેંકે કહ્યું છે કે MD અને CEO વી વૈદ્યનાથન (IDFC ફર્સ્ટ બેંકના CEO) તેમની ઉદારતા માટે પ્રખ્યાત છે. ફરી એકવાર તેમણે મૃતક સાથીદારના પરિવારને મદદ કરવાનું નક્કી કર્યું. આ હેઠળ, તેમણે મૃતકના સહયોગીઓને બેંકના 5 લાખ શેર આપ્યા, જેની વર્તમાન કિંમત 2.1 કરોડ રૂપિયાથી વધુ છે.
અગાઉ પણ દેખાડી ચૂક્યા છે દરિયાદિલી
વી વૈદ્યનાથન પણ ભૂતકાળમાં તેમના કર્મચારીઓ, ટ્રેનર્સ, ઘરેલુ સહાયકો અને ડ્રાઇવરોને મદદ કરીને ઘણીવાર ચર્ચામાં આવ્યા છે. કેટલીકવાર તેઓએ તેમની કાર અથવા ઘર ખરીદવામાં મદદ કરી છે અને ક્યારેક તેઓએ તેમના બાળકોના શિક્ષણ અને નાણાકીય સુરક્ષા માટે ભેટ તરીકે શેર આપ્યા છે. મીડિયા રિપોર્ટ્સ અનુસાર, વૈદ્યનાથન અત્યાર સુધીમાં પોતાના કર્મચારીઓને મદદ કરવા માટે 9 લાખથી વધુ શેર ગિફ્ટ કરી ચૂક્યા છે, જેની કિંમત 3.95 કરોડ રૂપિયાથી વધુ છે.