દુનિયાના કોઈપણ વ્યક્તિને બીજા દેશમાં જવું હોય તો પાસપોર્ટની જરૂર પડે છે. પાસપોર્ટ વગર કોઈ પણ વ્યક્તિ બીજા દેશમાં જઈ શકે નહીં. જ્યારે રાષ્ટ્રપતિથી લઈને વડાપ્રધાન પણ એક દેશથી બીજા દેશમાં જાય છે ત્યારે તેમણે પણ ડિપ્લોમેટિક પાસપોર્ટ રાખવાનો હોય છે. પાસપોર્ટ તેના ધારકની વ્યક્તિગત ઓળખ અને રાષ્ટ્રીયતાને પ્રમાણિત કરે છે. પાસપોર્ટમાં ધારકનું પૂરું નામ, ફોટોગ્રાફ, જન્મ સ્થળ અને જન્મ તારીખ, સહી અને પાસપોર્ટની સમાપ્તિ તારીખ હોય છે. પરંતુ શું તમે જાણો છો કે દુનિયામાં ત્રણ એવા ખાસ લોકો છે જેમને બીજા દેશમાં જવા માટે પાસપોર્ટની જરૂર નથી.
આજે અમે તમને આ ત્રણ લોકો વિશે જણાવીશું. આ ત્રણ લોકો બ્રિટનના રાજા અને જાપાનના રાજા અને રાણી છે. તેમના વિશે જાણો:-
બ્રિટનના રાજા
રાજા ચાર્લ્સ ત્રીજા આ મહિને બ્રિટનના રાજા બન્યા છે. તેમણે તેમની માતા અને મહારાણી એલિઝાબેથ દ્વિતીયના મૃત્યુ બાદ આ પદ સંભાળ્યું છે. તેમના રાજા બનતાની સાથે જ બ્રિટનના વિદેશ મંત્રાલયે તમામ દેશોને સૂચના આપી હતી કે બ્રિટનના રાજા ચાર્લ્સ ત્રીજાને સંપૂર્ણ સન્માન સાથે ગમે ત્યાં મુસાફરી કરવાની મંજૂરી આપવી જોઈએ અને તેમના પ્રોટોકોલનું વિશેષ ધ્યાન રાખવું જોઈએ. કિંગ ચાર્લ્સ પહેલાં, તેમની માતા રાણી એલિઝાબેથ દ્વિતીયને પાસપોર્ટ વિના ગમે ત્યાં જવાનો અધિકાર હતો.
તમને જણાવી દઈએ કે માત્ર સિંહાસન પર બેઠેલા રાજા કે રાણીને જ પાસપોર્ટ વગર ક્યાંય જવાનો અધિકાર છે. જો રાજા ચાર્લ્સ ત્રીજાની પત્ની વિદેશ જવા માંગે છે, તો તેમને રાજદ્વારી પાસપોર્ટની જરૂર પડશે. એ જ રીતે ક્વીન એલિઝાબેથ દ્વિતીયના સમયમાં તેમના પતિ પ્રિન્સ ફિલિપને પણ વિદેશ જવા માટે રાજદ્વારી પાસપોર્ટ રાખવો પડ્યો હતો.
જાપાનના સમ્રાટ અને મહારાણી
હાલમાં, જાપાનના સમ્રાટ નરુહિતો છે અને તેમની પત્ની માસાકો ઓવાડા જાપાનની મહારાણી છે. બાદશાહ અને મહારાણીને પાસપોર્ટ વગર વિદેશ જવાની વ્યવસ્થા 1971માં શરૂ થઈ હતી. જાપાન વિશ્વના તમામ દેશોને સત્તાવાર પત્ર મોકલે છે કે સમ્રાટ અને મહારાણી તેમના દેશમાં જવા માટે આ પત્ર તેમના પાસપોર્ટ તરીકે ગણવામાં આવે.
