ગુજરાત પોલીસે પ્રજાસત્તાક દિવસે અમદાવાદ શહેરમાં શ્રેણીબદ્ધ વિસ્ફોટ કરવાની ધમકી આપવા બદલ 34 વર્ષીય વ્યક્તિની ધરપકડ કરી છે. એક અધિકારીએ મંગળવારે આ જાણકારી આપી. અમદાવાદ ક્રાઈમ બ્રાન્ચની અખબારી યાદી મુજબ, તપાસમાં જાણવા મળ્યું છે કે આરોપી આશિષ કુમાર દુસાધનો ઈરાદો એક વ્યક્તિને ફસાવવાનો હતો, જેણે આશિષને તેની એક મહિલા સંબંધીથી દૂર રહેવા કહ્યું હતું.
રિલીઝમાં કહેવામાં આવ્યું છે કે તપાસ દરમિયાન જાણવા મળ્યું છે કે આશિષે બોમ્બ વિસ્ફોટ કરવાની ધમકી આપતો પત્ર લખ્યો હતો અને પત્રમાં પોતાની ઓળખ ઓમ પ્રકાશ પાસવાન તરીકે આપી હતી. વાસ્તવમાં, તે ઓમ પ્રકાશને ફસાવવા માંગતો હતો.
ઉત્તર પ્રદેશના બલિયાના રહેવાસી આશિષની ગુજરાતના ખેડા જિલ્લાના બારેજા ગામમાંથી ધરપકડ કરવામાં આવી હતી. તેની સામે ભારતીય દંડ સંહિતાની સંબંધિત કલમો હેઠળ કેસ નોંધવામાં આવ્યો છે.
પોલીસના જણાવ્યા અનુસાર, 24 જાન્યુઆરીએ અમદાવાદ પોલીસ કમિશનરની ઓફિસમાં એક પત્ર મળ્યો હતો, જેમાં પ્રજાસત્તાક દિને શ્રેણીબદ્ધ બ્લાસ્ટ કરવાની ધમકી આપવામાં આવી હતી. પોલીસે કહ્યું કે પત્ર હાથથી લખાયેલો હતો અને મોકલનારએ પોતાની ઓળખ ઓમ પ્રકાશ પાસવાન તરીકે આપી હતી અને તેમાં એક ફોન નંબર પણ આપવામાં આવ્યો હતો.
