બ્રિટનમાં દારૂ બનાવતી કંપનીની બિયરની બોટલોને લઈને હોબાળો શરૂ થયો છે. બીએન મંગર નામની આ કંપનીએ પોતાની બિયરની બોટલો પર હિન્દુ દેવી-દેવતાની તસવીર છાપી છે. હવે મામલો સામે આવ્યા બાદ કંપનીનો વિરોધ કરવામાં આવી રહ્યો છે. હિન્દુ સમુદાયે કંપનીને તેની પ્રોડક્ટ પાછી ખેંચવાની માંગ કરી છે. બ્રિટનમાં હિંદુઓ અને ભારતીયો સાથે જોડાયેલા મુદ્દાઓ પર અવાજ ઉઠાવતા સામાજિક પ્લેટફોર્મ ઇનસાઇટ યુકેએ આ અંગે માહિતી આપી છે.
ઇનસાઇટ યુકેએ દારૂનું ઉત્પાદન કરતી બિએન મંગર નામની કંપની સામે વિરોધ નોંધાવ્યો છે અને કહ્યું છે કે કંપની હિંદુઓની ભાવનાઓને ઠેસ પહોંચાડે તેવા ઉત્પાદનો બજારમાં વેચી રહી છે. ઇનસાઇટ યુકેએ આ બાબતે બીયરની તસવીર સાથે ટ્વિટ કરીને કાર્યવાહીની માંગ કરી છે.
લેબલ હટાવવાની માંગ ઉઠી હતી
બ્રિટનનો હિંદુ સમુદાય પણ બિયરની બોટલ પર ભગવાનનો ફોટો લગાવવાનો વિરોધ કરી રહ્યો છે. ત્યાં રહેતા હિન્દુઓએ કંપનીને બિયરની બોટલ પરના આ વિવાદાસ્પદ અને અપમાનજનક લેબલને હટાવવાની માંગ કરી છે અને કહ્યું છે કે જો બિયરની બોટલ પરથી આ તસવીર હટાવવામાં નહીં આવે તો વિરોધ વધુ ઉગ્ર બનશે. આ પહેલો કિસ્સો નથી કે જ્યારે દારૂ અને બીયર દ્વારા હિન્દુઓની ભાવનાઓને ઠેસ પહોંચાડવાનો પ્રયાસ કરવામાં આવ્યો હોય.
આ પહેલા પણ આના જેવા કિસ્સા ઘણી વખત સામે આવી ચૂક્યા છે. વર્ષ 2021માં ફ્રેન્ચ બ્રુઇંગ કંપની ગ્રેનેડ-સુર-ગારોને બજારમાં ‘શિવા બીયર’ લોન્ચ કરી હતી, જેના કારણે હિન્દુ સમુદાયે આક્રોશ વ્યક્ત કર્યો હતો. આટલું જ નહીં વર્ષ 2018માં પણ ડર્બીશાયર નામની એક લિકર કંપનીએ બિયરની બોટલ પર કાલી માતાની તસવીર છાપી હતી, જે બાદ હિન્દુ સંગઠનોએ કંપનીની ટીકા કરી હતી.