રાજસ્થાનના જોધપુરમાં જ્યાં દુલ્હનની ડોલી ઘરે આવવાની હતી ત્યાં છેલ્લા પાંચ દિવસથી માત્ર મૃતદેહો જ આવી રહ્યા છે. શેરગઢના ભૂંગરા ગામમાં લગ્ન સમારોહમાં સિલિન્ડર બ્લાસ્ટમાં મૃત્યુઆંક દરરોજ વધી રહ્યો છે. સારવાર દરમિયાન વધુ ચાર લોકોના મોત થયા છે જે બાદ મૃત્યુઆંક 31 પર પહોંચી ગયો છે.
લગભગ એક અઠવાડિયા પહેલા ભૂંગરા ગામમાં લગ્નનો વરઘોડો આવે તે પહેલા સિલિન્ડર બ્લાસ્ટમાં વરરાજાના મોટાભાગના સંબંધીઓના મોત થયા હતા. લગ્નના દિવસે થયેલા અકસ્માત બાદ એક પણ દિવસ એવો નથી પસાર થયો કે જ્યારે એક યા બીજા પ્રિયજનની લાશ ઘરે ન આવી હોય.
ગુરુવારે વધુ ચાર લોકોના મોત થયા
ગુરુવારે પણ હોસ્પિટલમાં સારવાર દરમિયાન ચાર મહિલાઓના મોત થયા હતા, જેમાં 40 વર્ષીય અનાંચી કંવર, 29 વર્ષીય રસલ કંવર, 57 વર્ષીય સુગન કંવર અને 40 વર્ષીય ધાપુ કંવરનો સમાવેશ થાય છે. આ તમામ લોકોના મૃતદેહોને મોર્ચરીમાં રાખવામાં આવ્યા છે. સરકાર દ્વારા મૃતકોને આપવામાં આવતું વળતર અપૂરતું હોવાનું જણાવી શબઘર બહાર રાજપૂત સમાજના લોકો હોસ્પિટલની બહાર ધરણા પર બેઠા છે.
આ અકસ્માતમાં વરરાજા સુરેન્દ્ર સિંહના માતા-પિતા સહિત અત્યાર સુધીમાં 31 સગા-સંબંધીઓના મોત થયા છે. હવે લોકો લગ્નને બદલે શ્રાદ્ધ અને તેરશની વાતો કરે છે. સુરેન્દ્ર સિંહના એક ભાઈ અકસ્માતના દિવસથી ગામમાં જ રોકાયા છે જેથી કરીને તેમના પ્રિયજનોના અંતિમ સંસ્કાર યોગ્ય રીતે થઈ શકે. આ બનાવથી સમગ્ર ભુંગરા ગામમાં શોકનું મોજુ છવાઈ ગયું છે.
સ્થિતિ એવી છે કે ઘાયલોના પરિવારના સભ્યો ICUની બહારની બારીમાંથી પોતાના પ્રિયજનોને જોતા રહે છે અને અવાજ આવતાં જ તેમનું હૃદય ડરી જાય છે કે કોઈ અપ્રિય ઘટનાના સમાચાર તેમના સુધી ન પહોંચે. ભુંગરા ગામની સ્થિતિ એવી બની ગઈ છે કે હોસ્પિટલથી કોઈ વાહન ગામ તરફ આવતાની સાથે જ ગ્રામજનો અંતિમ સંસ્કારની તૈયારીઓ કરવા લાગે છે કારણ કે તેમને લાગે છે કે કોઈ સારા સમાચાર આવવાના નથી.
વિપક્ષના નેતાએ હોસ્પિટલની મુલાકાત લીધી હતી
વિધાનસભામાં વિપક્ષના નાયબ નેતા અને પૂર્વ મંત્રી રાજેન્દ્ર રાઠોડ ગુરુવારે મોડી રાત્રે મહાત્મા ગાંધી હોસ્પિટલ પહોંચ્યા હતા અને ઘાયલોની સારવાર માટેની વ્યવસ્થાની સમીક્ષા કરી હતી. તેમણે તબીબોની ટીમનો પણ આભાર માન્યો હતો. તેઓ શબઘરમાં ચાલી રહેલા ધરણામાં થોડો સમય બેઠા હતા અને સરકાર પાસે આ સમગ્ર ઘટના અંગે 20 કરોડ રૂપિયાનું પેકેજ જાહેર કરવા અને મૃતકના પરિવારને એક કરોડ રૂપિયા આપવામાં આવે તેવી માંગ કરી હતી.
તેમણે ઘાયલોને 25 લાખ રૂપિયાના વળતરની પણ માંગ કરી છે. શેરગઢના પૂર્વ ધારાસભ્ય બાબુ સિંહ રાઠોડે જણાવ્યું કે અમે જિલ્લા વહીવટીતંત્રને એક મેમોરેન્ડમ આપ્યું છે અને માંગણીઓની યાદી સોંપી છે. ભાજપના પ્રદેશ અધ્યક્ષ સતીશ પુનિયા પણ જોધપુરમાં ઘાયલોને મળશે અને પરિવારના અન્ય સભ્યોને સાંત્વના આપવા ભૂંગરા ગામમાં જશે.