ફોર્ચ્યુન સનફ્લાવર ઓઈલ વિટામિન D ટેસ્ટમાં ફેલ, FSSAI એ કંપની પર ફટકાર્યો દંડ

દેશમાં પેકેજ્ડ ફૂડ અને ખાધ્ય તેલની ગુણવત્તા પર નજર રાખતી સંસ્થા ફૂડ સેફ્ટી એન્ડ સ્ટેન્ડર્ડ્સ ઓથોરિટી ઓફ ઈન્ડિયા (FSSAI) એ કડક વલણ અપનાવ્યું છે. અમદાવાદ સ્થિત અને અદાણી વિલ્મર જૂથ સાથે જોડાયેલી કંપની AWL એગ્રી બિઝનેસ લિમિટેડ દ્વારા ઉત્પાદિત કરવામાં આવતા પ્રખ્યાત ‘ફોર્ચ્યુન ગ્રાન્ડ/ફ્રાયોલા’ રિફાઈન્ડ સનફ્લાવર ઓઈલના સેમ્પલ વિટામિન ડી ટેસ્ટમાં નાપાસ થતાં FSSAI એ દંડ ફટકાર્યો છે.

FSSAI ની ટીમે રૂટીન ચેકિંગ દરમિયાન ગોવા સ્થિત તાજ ફોર્ટ અગુઆડા રિસોર્ટ એન્ડ સ્પા (Taj Fort Aguada Resort & Spa) માંથી ૧ લીટરનું ફોર્ચ્યુન ફ્રાયોલા રિફાઈન્ડ સનફ્લાવર સેમ્પલ એકત્રિત કર્યું હતું.

પ્રાથમિક ફૂડ લેબોરેટરીમાં તપાસ દરમિયાન આ સેમ્પલ ફૂડ સેફ્ટી એન્ડ સ્ટેન્ડર્ડ્સ (ફોર્ટિફિકેશન ઓફ ફૂડ્સ) રેગ્યુલેશન્સ, 2018 ના નિર્ધારિત ધોરણો પર ખરું ઉતર્યું ન હતું. તપાસ રિપોર્ટમાં જાણવા મળ્યું કે આ ફોસ્ફેટ/ફોર્ટિફાઈડ તેલમાં વિટામિન એ અને વિટામિન ડીનું પ્રમાણ નક્કી કરેલી મર્યાદા કરતાં ઘણું ઓછું હતું.

રી-ટેસ્ટિંગમાં પણ સેમ્પલ ફેલ જાહેર થયું

જ્યારે પ્રાથમિક ટેસ્ટમાં તેલ ‘સબસ્ટેન્ડર્ડ’ (નિમ્ન ગુણવત્તાવાળું) જાહેર કરવામાં આવ્યું, ત્યારે કંપની AWL એગ્રી બિઝનેસે આ રિપોર્ટને પડકાર્યો હતો. ત્યારબાદ આ સેમ્પલને રીફરલ લેબોરેટરીમાં પુનઃ તપાસ માટે મોકલવામાં આવ્યું હતું.

રિફરલ લેબોરેટરીના આખરી રિપોર્ટમાં પણ પુષ્ટિ થઈ હતી કે, “ફોર્ચ્યુન સનફ્લાવર ઓઈલના સેમ્પલમાં વિટામિન ડીનું પ્રમાણ નિર્ધારિત મર્યાદા કરતાં નોંધપાત્ર રીતે ઓછું છે, જેના કારણે ઉત્પાદન નબળી ગુણવત્તાવાળું સાબિત થાય છે.”

આ રિપોર્ટ બાદ સેન્ટ્રલ લાઇસન્સિંગ ઓથોરિટીએ કાનૂની કાર્યવાહીની મંજૂરી આપી હતી અને ગોવાના એડજ્યુડિકેટિંગ ઓફિસરે કંપની સામે દંડનો આદેશ જારી કર્યો હતો.