ઉત્તર ભારતમાં શીતલહેરના કારણે ગુજરાત પણ ઠૂંઠવાશે, જાણો ક્યારે પડશે ઠંડી?

ગુજરાતમાં પહેલા વરસાદની આગાહી બાદ હવે કાતિલ ઠંડી પાડવાની આગાહી પણ હવામાન વિભાગે કરી છે. હવામાન વિભાગે દિલ્હી સહિત આઠ રાજ્યોમાં કાતિલ ઠંડીનું મોજું ફરી વળવાની આગાહી કરી છે, જેમાં દિલ્હી, પંજાબ, હરિયાણા, ચંદીગઢ, પશ્ચિમી ઉત્તર પ્રદેશ અને રાજસ્થાન તથા જમ્મુ-કાશ્મીર અને હિમાચલ પ્રદેશમાં કાતિલ ઠંડી પડશે. જેના કારણે ગુજરાતમાં પણ કાતિલ ઠંડી પડશે.

ઉત્તર ભારતના રાજ્યો તરફથી વાતા સૂસવાટા ભર્યા ઠંડા પવનોના પગલે સમગ્ર ઉત્તર-પશ્ચિમ ભારતના મેદાની પ્રદેશોમાં શીત લહેર ફરી વળશે. જો કે હવામાન ખાતાએ એવી આગાહી કરી હતી કે આગામી ત્રણ દિવસમાં ઠંડીનો કોપશાંત થઇ જશે પરંતુ એ પછી વરસાદ પડે એવી સંભાવના વધી ગઇ છે.

હવામાન ખાતાએ કહ્યું હતું કે હિમાલયના પશ્ચિમના ભાગોમાં હળવા વરસાદની સાથે બરફવર્ષા થવાથી તાપમાનમાં ઘણો મોટો ઘટાડો થઇ શકે છે. ઉત્તર ભારતના ઘણા સ્થળોએ વરસાદની આગાહીને પગલે ગુજરાતમાં પણ વરસાદ પડશે તેવી આગાહી હવામાન વિભાગે કરી છે. 5 જાન્યુઆરીએ ઉત્તર ગુજરાત સહિત ગુજરાતના કેટલાક જિલ્લાઓમાં માવઠું થવાની આગાહી હવામાન વિભાગે કરી છે. બીજી તરફ અમદાવાદમાં 8 જાન્યુઆરીથી ઠંડી વધવાની શક્યતા છે.

હવામાન વિભાગની આગાહી મુજબ, રાજ્યમાં 5 જાન્યુઆરીના રોજ ઉત્તર ગુજરાતના અમુક જિલ્લાઓમાં કમોસમી વરસાદ પડી શકે છે, જેમાં બનાસકાંઠા, સાબરકાંઠા, અરવલ્લી તથા મહિસાગરમાં છૂટા છવાયા વરસાદની આગાહી કરવામાં આવી છે. રવિ પાકની ઋતુમાં વરસાદની આગાહીથી જગતના તાતને ફરી એક વાર પાકને થવાની ભીતિ સતાવી રહી છે.

ગુજરાતના ગાંધીનગરમાં 6.4 ડિગ્રી, ડીસામાં 6.6 ડિગ્રી, અમદાવાદમાં 8.1, સુરેન્દ્રનગરમાં 8.5, વલસાડમાં 9.1 ડિગ્રી, વડોદરામાં 9.4 ડિગ્રી અને આણંદમાં 10 ડિગ્રી ઠંડી રહી હતી. ઠંડીને કારણે ગુજરાતના અનેક સ્થળો પર હિલ સ્ટેશન જેવો માહોલ જોવા મળ્યો હતો.