કોલ્ડ વેવ: ઉત્તર ભારતમાં હિમવર્ષાને કારણે ગુજરાતમાં વધી શકે છે ઠંડી

ગુજરાતમાં હજુ વધુ ઠંડી પાડવાની અને કોલ્ડ વેવની આગાહી હવામાન વિભાગે કરી છે. ઠંડી વધવાનું કારણ ઉત્તર ભારતમાં થયેલી હિમવર્ષા છે. ઉત્તર ભારતના પર્વતીય રાજ્યો જમ્મુ-કાશ્મીર, ઉત્તરાખંડ અને હિમાચલ પ્રદેશમાં ભારે હિમવર્ષા થઈ છે.

પહાડો પર ભારે બરફવર્ષાને પગલે અને ત્યાંથી પવનો ફૂંકાવાને કારણે ઉત્તર ગુજરાતમાં પણ ઠંડા પવનો ફૂંકાતા કોલ્ડવેવની આગાહી છે. હવામાન વિભાગના જણાવ્યા અનુસાર, ઉત્તર ગુજરાતના બનાસકાંઠા, પાટણ, ગાંધીનગર અને અમદાવાદમાં કાતિલ ઠંડીનું મોજું ફરી વળશે. બનાસકાંઠા અને પાટણના સરહદી રણ વિસ્તારમાં હાડ થીજવી નાખે એવી કાતિલ ઠંડી પડશે.

આ સાથે જ હવામાન વિભાગે જણાવ્યું છે કે રાજ્યમાં ઠંડીનો ત્રીજો રાઉન્ડ શરૂ થશે. રાજ્યમાં લઘુતમ તાપમાન 3થી 5 ડિગ્રી ઘટ્તા ઠંડીનું પ્રમાણ વધશે તેવું પણ હવામાન વિભાગે ઉમેર્યું છે. હવામાન વિભાગના જણાવ્યા પ્રમાણે અમદાવાદ, ગાંધીનગર, વડોદરા સહિતના જિલ્લાઓમાં ઠંડી વધશે.

ઉલ્લેખનીય છે કે આ પહેલા 5-6 જાન્યુઆરીના રોજ પણ ગુજરાતમાં વાદળછાયું વાતાવરણ રહ્યું હતું, સાથે જ ઘણા વિસ્તારોમાં વરસાદના ઝાપટા પણ થયા હતા. વરસાદને કારણે ગુજરાતના ઘણા વિસ્તારોમાં શિયાળામાં પણ ચોમાસાનો અનુભવ થયો હતો. વરસાદને કારણે વધુ ઠંડી પડી હતી.

શિયાળામાં પણ વરસાદ પડવાને કારણે ખેડૂતોની હાલત ખરાબ થઈ ગઈ છે, ઉભા પાકને નુકસાન થાય છે. ત્યારે ફરી એકવાર રાજયમાં વરસાદને કારણે ખેડૂતો પર માઠી દશા બેઠી હોય તેવી પરિસ્થિતિ ઉભી થઈ છે. ત્યારે હવે ફરી વરસાદ અને ઠંડી એક સાથે સહન કરવા પ્રજાએ તૈયાર રહેવું પડશે.

ભર શિયાળે વરસાદ પડવાને કારણે હવે લોકોએ ગરમ કપડાની સાથે ચાતરી કે રેઇનકોટ પણ સાથે રાખવાની ફરજ પડી છે. આ વરસે શિયાળામાં માવઠું પડવાનો ક્રમ વધી ગયો છે, આના પરથી હવામાનમાં થતા મોટા ફેરફારો સ્પષ્ટ દેખાય છે.