રશિયા સાથેની લડાઈમાં યુક્રેનને વધુ મજબૂત કરશે અમેરિકા, આપશે લડવા માટે આટલા હથિયારો

યુક્રેન-રશિયા યુદ્ધ વચ્ચે અમેરિકન રાષ્ટ્રપતિ જો બિડેને યુક્રેનને 800 મિલિયન ડોલરના પેકેજની જાહેરાત કરી છે. વ્હાઇટ હાઉસ દ્વારા જારી કરવામાં આવેલા નિવેદન અનુસાર, અમેરિકા યુક્રેનને 800 એન્ટી એરક્રાફ્ટ સિસ્ટમ, 9000 એન્ટી આર્મર સિસ્ટમ, 7000 નાના હથિયારો, 20 મિલિયન રાઉન્ડ, માનવરહિત એરિયલ સિસ્ટમ આપશે. સંરક્ષણ વિભાગ યુક્રેનિયન સૈન્યને સાધનો આપશે. નિવેદનમાં કહેવામાં આવ્યું છે કે યુક્રેનને વધારાની સહાય પૂરી પાડવા માટે સહયોગીઓ અને ભાગીદારો સાથે કામ કરવાનું ચાલુ રાખશે.

યુએસ પ્રમુખ જો બિડેનની જાહેરાત પહેલા, યુક્રેનના રાષ્ટ્રપતિ વોલોડીમિર ઝેલેન્સકીએ યુએસ સંસદને સંબોધિત કરી અને વધુ મદદ માટે અપીલ કરી હતી.

The new $800M package includes:
– 800 anti-aircraft systems
– 9,000 anti-armor systems
– 7,000 small arms
– 20 Million rounds
– Unmanned aerial systems
And more.

— The White House (@WhiteHouse) March 16, 2022

નો-ફ્લાય ઝોન જાહેર કરવાનો આગ્રહ રાખવાને બદલે, ઝેલેન્સકીએ રશિયન આક્રમણને રોકવા માટે લશ્કરી મદદ માંગી. નોંધનીય છે કે વ્હાઇટ હાઉસે નો-ફ્લાય ઝોન જાહેર કરવાની ઝેલેન્સકીની વિનંતીને સ્વીકારવાનો ઇનકાર કરી દીધો છે.

ઝેલેન્સકીએ અમેરિકન સંસદને સંબોધિત કરવા દરમિયાન પર્લ હાર્બર અને 11 સપ્ટેમ્બર, 2001ના રોજ થયેલા આતંકવાદી હુમલાનો પણ ઉલ્લેખ કર્યો હતો.

તમને જણાવી દઈએ કે યુક્રેન અને રશિયા વચ્ચેના યુદ્ધને 21 દિવસ થઈ ગયા છે. સંયુક્ત રાષ્ટ્રનું કહેવું છે કે યુદ્ધના કારણે અત્યાર સુધીમાં 30 લાખથી વધુ લોકો યુક્રેન છોડી ચૂક્યા છે. યુએનના માનવાધિકાર એકમે કહ્યું કે યુદ્ધમાં 691 નાગરિકોના મોત થયા છે અને 1,143 ઘાયલ થયા છે. જાનહાનિ આનાથી પણ વધુ હોઈ શકે છે.