આ વ્યક્તિથી પાકિસ્તાન એટલું ત્રાસી ગયુ કે હત્યા માટે સોપારી આપી દીધી

પાકિસ્તાનની સરકાર અને સેના વિરુદ્ધ બોલવા બદલ એક બ્લોગરનો જીવ જોખમમાં મુકાયો હતો. તેને મારવા માટે કાવતરું ઘડવામાં આવ્યું હતું, પરંતુ તે કોઈક રીતે બચી ગયો હતો. પાકિસ્તાની મૂળના વ્યક્તિનું કહેવું છે કે આ ષડયંત્ર પાછળ તેનો દેશ છે અને પાકિસ્તાને જ હુમલાખોરને તેની હત્યા કરવાનો કોન્ટ્રાક્ટ આપ્યો હતો. બ્લોગર અહેમદ વકાસ ગોરૈયા તેમના પરિવાર સાથે નેધરલેન્ડમાં રહે છે. ત્યાં જ તેને નિશાનો બનાવવામાં આવ્યો હતો.

પાકિસ્તાની હુમલાખોર દોષિત

કેટલાક મીડિયા રિપોર્ટોમાં પ્રકાશિત સમાચાર અનુસાર બ્રિટનની એક અદાલતે પૂર્વ લંડનમાં એક સુપરમાર્કેટમાં કામ કરતા 31 વર્ષીય બ્રિટિશ પાકિસ્તાની વ્યક્તિ મોહમ્મદ ગોહિર ખાનને આ કેસમાં દોષિત ઠેરવ્યો છે. ખાન પર અહેમદ વકાસ ગોરૈયાની હત્યાનું કાવતરું ઘડવાનો આરોપ હતો. ખાનની સજા અંગેનો ચુકાદો 11 માર્ચે સંભળાવવામાં આવશે. માનવામાં આવી રહ્યું છે કે તેને આજીવન કેદની સજા થઈ શકે છે. પોલીસ મોહમ્મદના સાથીદારને પણ શોધી રહી છે, જે ઘટના બાદથી ફરાર છે.

ગત વર્ષે સોપારી મળી હતી

ખાન નેધરલેન્ડથી બ્રિટન પરત ફર્યો હતો, જ્યાં બાદમાં પોલીસે તેની ધરપકડ કરી હતી. અહેમદ વકાસ ગોરૈયાએ પોતાની કેટલીક સોશિયલ મીડિયા પોસ્ટમાં પાકિસ્તાનની સરકાર અને સેનાની ટીકા કરી હતી. આ પછી તેની હત્યા કરવાનું કાવતરું ઘડવામાં આવ્યું હતું. તપાસ એજન્સીએ કોર્ટને જણાવ્યું હતું કે ગત વર્ષની શરૂઆતમાં મિઝામિલ નામના પાકિસ્તાની મૂળના વ્યક્તિએ ખાનનો સંપર્ક કર્યો હતો અને બ્લોગરની હત્યા કરવા માટે તેને નોકરી પર રાખ્યો હતો.

માસ્ટરમાઇન્ડ કસ્ટડીમાંથી બહાર

તપાસમાં એ પણ બહાર આવ્યું છે કે મોહમ્મદ ગોહિર ખાને બ્લોગરની હત્યા માટે એડવાન્સ તરીકે 5000 પાઉન્ડ મળ્યા હતા. આ રકમ મુઝામિલના પાકિસ્તાની બેંક ખાતામાંથી ચૂકવવામાં આવી હતી. કામ પૂરું થયા બાદ ખાનને બીજા 80,000 પાઉન્ડ મળવાના હતા. પોલીસ પૂછપરછ દરમિયાન ખાને કબૂલાત કરી હતી કે તેને બ્લોગરની હત્યાનો કોન્ટ્રાક્ટ આપવામાં આવ્યો હતો. પરંતુ તેનો તેને મારવાનો બિલકુલ ઈરાદો નહોતો. ત્યાં જ બ્લોગર અહેમદ વકાસ ગોરૈયાએ દુ:ખ વ્યક્ત કર્યું કે પોલીસ તેની હત્યા માટે સોપારી આપનાર સુધી પહોંચી શકી નથી. તેમણે કહ્યું કે તેઓ જાણે છે કે આ ષડયંત્ર પાછળ પાકિસ્તાનનો હાથ છે.