કોરોનાના નવા વેરિઅન્ટને લઇ WHOના વૈજ્ઞાનિકની ચેતવણી, આવી શકે છે સૌથી વધુ ખરાબ સમય

સોશિયલ મીડિયામાં ચર્ચા દરમિયાન WHO વૈજ્ઞાનિક મારિયા વાન કેરખોવે કહ્યું કે, આખી દુનિયામાં કોવિડ કેસમાં રેકોર્ડ વધારો થયો છે. જોકે તેમણે કહ્યું કે ઓમિક્રોન કોવિડના અગાઉના પ્રકારો જેટલો જોખમી નથી. પરંતુ તેમણે ચેતવણી પણ આપી હતી કે કોવિડનો આગામી પ્રકાર આના કરતા વધુ ખતરનાક હોઈ શકે છે. ગત અઠવાડિયે વિશ્વમાં કોરોનાના 21 મિલિયન કેસ નોંધાયા હતા. જે એ વાતના સંકેત આપે છે કે કોવિડ-19 ની ત્રીજી લહેર કેટલી ઝડપી છે.

વિશ્વભરના રિસર્ચર્સનું માનવું છે કે ઓમિક્રોન વેરિએન્ટ કોવિડનો અંતિમ પ્રકાર નથી. WHOના વૈજ્ઞાનિકોનું માનવું છે કે કોવિડ-19નો બીજો પ્રકાર જે ઓમિક્રોન કરતાં પણ વધુ ઝડપી ફેલાશે, તે ટૂંક સમયમાં જ દુનિયામાં જોવા મળી શકે છે.

મારિયાએ કહ્યું કે અત્યારે આખી દુનિયા સામે સૌથી મોટો પ્રશ્ન એ છે કે કોવિડનો આગામી પ્રકાર કેવી રીતે પ્રતિક્રિયા આપશે અને શું તે વધુ ઘાતક હશે કે ઓછો. તેમણે કહ્યું કે લોકોએ એવા ભ્રમમાં ન રહેવું જોઈએ કે સમયની સાથે કોરોનાના પ્રકારો નબળા પડી જશે અને ઓછા લોકો બીમાર પડશે. તેમણે કહ્યું કે અમે આગામી વેરિએન્ટ ઓછો ખતરનાક હોવાની અપેક્ષા રાખી શકીએ પરંતુ તેની ખાતરી આપી શકતા નથી. WHOના વૈજ્ઞાનિકે કહ્યું કે જ્યાં સુધી કોરોના સંક્રમણ છે ત્યાં સુધી કોવિડ-19 પ્રોટોકોલનું પાલન કરવુ જોઈએ. આ સાથે જ તેમણે એમ પણ કહ્યું કે આગામી સંસ્કરણમાં પોતાને રસીથી બચાવવાની ક્ષમતા પણ હશે અને તે ઓમિક્રોન કરતાં વધુ ઝડપે ફેલાઇ શકે છે.