યુક્રેનના રાષ્ટ્રપતિ ઝેલેન્સકીએ એલન મસ્કને કહ્યું- ‘પધારો મ્હારે દેસ…’

યુક્રેનના રાષ્ટ્રપતિ વોલોડીમિર ઝેલેન્સકીએ ટેસ્લાના સ્થાપક અને સીઈઓ એલન મસ્કને યુદ્ધ પછી તેમના દેશની મુલાકાત લેવા આમંત્રણ આપ્યું છે. બંને વચ્ચે થયેલી મીટીંગનો વીડિયો ઝેલેન્સકીના ઈન્સ્ટાગ્રામ પર પોસ્ટ કરવામાં આવ્યો હતો.

ઝેલેન્સકીએ ટ્વિટર પર પોસ્ટ કર્યું, ‘મેં એલન મસ્ક સાથે વાત કરી. શબ્દો અને કાર્યોથી યુક્રેનને ટેકો આપવા બદલ હું તેમનો આભારી છું. આવતા અઠવાડિયે અમે નાશ પામેલા શહેરો માટે સ્ટારલિંક સિસ્ટમનો બીજો બેચ પ્રાપ્ત કરીશું. સંભવિત રીતે સ્પેસ પ્રોજેક્ટ્સની ચર્ચા કરી. પરંતુ હું તેના વિશે યુદ્ધ પછી વાત કરીશ.’

મસ્કે શનિવારે કહ્યું હતું કે સ્ટારલિંક, તેની રોકેટ કંપની સ્પેસએક્સનું સેટેલાઇટ ઇન્ટરનેટ વિભાગ, રશિયન સમાચાર સ્ત્રોતોને બ્લોક કરશે નહીં. મસ્કે લખ્યું, સ્ટારલિંકને કેટલીક સરકારો (યુક્રેન નહીં) દ્વારા રશિયન સમાચાર સ્ત્રોતોને બ્લોક કરવા માટે કહેવામાં આવ્યું છે. તે અભિવ્યક્તિની સ્વતંત્રતાના સમર્થક છે અને જ્યાં સુધી બંદૂકની અણી પર કહેવામાં ન આવે ત્યાં સુધી તે રશિયન સંગઠનોને બ્લોક કરશે નહીં.

દરમિયાન, એપલ, ગૂગલ, માઈક્રોસોફ્ટ, ટ્વિટર, યુટ્યુબ, મેટા અને અન્ય કેટલાક ટેક પ્લેટફોર્મ સહિત ટેક જાયન્ટ્સે યુક્રેન પર રશિયાના આક્રમણને પગલે આરટી અને સ્પુટનિક પર પહેલેથી જ પ્રતિબંધ મૂક્યો છે. યુક્રેન પરના આક્રમણ બાદ વિશ્વભરની કંપનીઓએ રશિયા પર કડક પ્રતિબંધો લાદવાનું શરૂ કર્યું છે.

તમામ કંપનીઓએ પોતાનું કામકાજ બંધ કરવાની જાહેરાત કરી છે, જેના કારણે રશિયાની મુશ્કેલીઓ વધવાની આશંકા છે. જો કે આ બધું હોવા છતાં રશિયાના રાષ્ટ્રપતિ વ્લાદિમીર પુતિને યુક્રેન પર હુમલો કરવાનું બંધ કર્યું નથી.